भांगरभूंय | प्रतिनिधी
मडगांवः गोंय तियात्र अकादेमी कडल्यान 10 कलाकारांक जीवन गौरव पुरस्कार दितले. तांचीं नांवां जाहीर जाल्यांत. शेनवार, 14 डिसेंबराक पाय तियात्रिस्त जुआंव आगोस्तिन फर्नांडिस हांचे जयंती दिसा ह्या पुरस्कारांचें वितरण जातलें.
गोंय तियात्र अकादेमीचे अध्यक्ष अँथनी बार्बोझा हांणी मडगांवां घेतिल्ले पत्रकार परिशदेंत पुरस्कार फावो जाल्ल्या कलाकारांचीं नांवां जाहीर केलीं. ह्या वेळार प्रेमानंद लोटलीकार, विलियम्स हाजीर आशिल्ले. शेनवार, 14 डिसेंबराक दनपारां 3.30 वरांचेर मडगांव रवींद्र भवनांतल्या पाय तियात्रिस्त हॉलांत पुरस्कार वितरण कार्यावळ जातली. हे खातीर वेगवेगळ्या शाळांतल्या विद्यार्थ्यांक आपयल्यात. हे पुरस्कार वेवसायीक आनी बिगर वेवसायीक अशा दोन गटांनी दितले.
वेवसायीक गटांतल्यान डोमिंगो कुएलो, शेख अमीरोद्दीन उर्फ शेख अमीर, झेविअर फर्नांडिस उर्फ पाकलो, जयकिशन धर्मू नायक उर्फ किसन दे चिंचणी आनी सॅम्युअल कार्व्हालो हांकां जीवन गौरव पुरस्कार दितले. जाल्यार बिगर वेवसायीक गटांतल्यान जुझे आंतानिओ परेरा उर्फ जेपी, पीटर फर्नांडिस, जुझे एमएफ दी जे एन. बार्रेटो उर्फ जुजू, पेद्रो कुलासो आनी फ्रान्सिस फर्नांडिस हांकां पुरस्कार दितले.
ह्या पुरस्कार वितरण कार्यावळींत मुखेल सोयरी म्हूण गायिका हेमा सरदेसाय, कला आनी संस्कृती खात्याचे संचालक सगुण वेळीप हाजीर आसतले. तशेंच डोमिंगोज अरावजो, रवींद्र भवनाचे अध्यक्ष राजेंद्र तालक, शर्मिला फर्नांडिस आनी गोंय तियात्र अकादमीचे अध्यक्ष अँथनी बार्बोझा हाजीर आसतले. ह्या कार्यावळीं वेळार कोंकणी संगिताचीय कार्यावळ आयोजीत केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
