भांगरभूंय | प्रतिनिधी
मॉर्फ व्हिडियो: दुबावितान जामीन अर्ज घेतलो फाटीं
पणजी ः कांय दिसा आदीं मॉर्फ केल्लो अश्लील व्हिडियो सोशल मिडियाचेर अपलोड करून नांव बदनाम करपाची धमकी दिवन तांचे कडल्यान खंडणी मागिल्ल्याची कागाळ एका आमदारान गुन्यांव फांट्यांत केल्ली. ते उपरांत पुलिसांनी चवकशी करुन कुकेश रावत हाका अटक केल्ली. तशेंच ताचे कडल्यान आमदाराचो मॉर्फ व्हिडियो केल्लो मोबायलूय जप्त केलो. अशें आसून लेगीत आतां त्या आमदाराचो आक्षेपार्ह व्हिडीयो ट्विटरार व्हायरल जाला. दुबावीत पुलिशेंत आसतनाय हो व्हिडीयो अपलोड जाल्ल्यान खूबशे प्रस्न निर्माण जाल्यात. ही एक अजाप करपा सारकी गजाल. काय हातूंत आनीक कोण सामील आसात, असो प्रस्न लोकांक पडला.
मॉर्फ केल्लो अश्लील व्हिडियो सोशल मिडियाचेर अपलोड करून नांव बदनाम करपाची धमकी दिवन लाखांनी रुपयांची फटवणूक केल्ले प्रकरणांतलो दुबावीत कुकेश रावतान जामीन अर्ज फाटीं घेतलो. पयलो वर्ग न्यायालयांत दाखल केल्लो जामीन अर्ज फाटीं घेतिल्ल्यान ह्या प्रकरणाक वेगळोच वळण मेळपाची शक्यताय आसा.
मॉर्फ केल्लो अश्लील व्हिडियो अपलोड करून बदनामी करपाची धमकी दिवन गोंयांतल्या एका आमदारा कडल्यान 5 कोटी रुपयांची खंडणी मागिल्ली. उपरांत गुन्यांव फांट्यान 2 डिसेंबराक गुन्यांव नोंद करून चवकशी सुरू केल्ली. गुन्यांव फांट्यान ह्या प्रकरणांत ओडिशाच्या 25 वर्सां पिरायेच्या कुकेश रावताक अटक करून ताचो मोबायल जप्त केलो.
ह्या प्रकरणांत संबंदीत आमदारान गुन्यांव फांट्यांत कागाळ दाखल केल्ली. तांतूत कुकेशान 5 डिसेंबर 2023 आदीं ताका व्हिडियो कॉल करुन संपर्क केल्ल्याचें म्हणलां. तशेंच तो व्हिडियो कॉल रेकॉर्ड करुन घेतलो. ते उपरांत एके बायले वांगडा मॉर्फ करून एक अश्लील व्हिडियो तयार केलो. हो व्हिडियो उल्लेख केल्ल्या आमदाराक धाडून बदनामी करपाची धमकी दिवन 5 कोटी रुपयांची खंडणी मागली. ताचे कडल्यान 55 हजार रुपयाय घेतले अशें संबंदीत आमदारान कागाळींत सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
