भांगरभूंय | प्रतिनिधी
नवी दिल्ली, खबरां संस्था ः नोव्हेंबरांत अन्नधान्यांचे दर 19 म्हयन्यांच्या उंचेल्या पांवड्यार पावले. संयुक्त राश्ट्रांच्या अन्न आनी शेतकी संघटनेच्या (FAO) आंकड्यां प्रमाण ही वाड नोव्हेंबर 2024 वर्सा वनस्पती तेलाच्या दरांत वाड जाल्ल्यान जाल्या.
एफएओच्या आंकड्यां प्रमाण नोव्हेंबरांत अन्न दराच्या निर्देशांकांत सरासरी 127.5 अंक आशिल्ले, जे ऑक्टोबरांतल्या पातळे परस 0.5 टक्क्यांनी चड आसा. फाटल्या वर्सा परस 5.7% चड आसा. एप्रिल 2023 उपरांत हो निर्देशांक सगळ्यांत उंचेल्या पांवड्यार आसा.
व्हेजिटेबल तेलाचे दर 7.5 टक्क्यांनी वाडले
फाटल्या म्हयन्याच्या तुळेंत व्हेजिटेबल तेलाचे दर 7.5 टक्क्यांनी वाडल्यात. जुलय 2022 उपरांत एकाच म्हयन्यांत सगळ्यांत चड नेटान जाल्ली ही वाड. पामतेल, रेपसीड, सोया आनी सूर्यफूल तेल हांचे दर वाडिल्ल्यान ही वाड जाल्या. ह्या काळांत लोणी आनी चीज हांचे वांगडा डेअरी मिल्क पावडराचे दरय 0.6 टक्क्यांनी वाडल्यात. साकरेचे दर ऑक्टोबराच्या तुळेंत 2.4 टक्क्यांनी आनी फाटल्या वर्सा नोव्हेंबराच्या तुळेंत 21.7 टक्क्यांनी देंवले.
फाटल्या वर्साच्या तुळेंत मांसाचे दर 5.9 टक्क्यांनी वाडल्यात
मांसाचे दर म्हयन्याक 0.8 टक्क्यांनी देंवले, पूण फाटल्या वर्साचे तुळेंत 5.9 टक्क्यांनी वाडले. पुरवण चड आशिल्ल्यान आनी मागणी उणी आशिल्ल्यान दुकराच्या मांसाचे दर देंवले. पूण तांतयां आनी चिकनांत मात्सो उणाव दिसून आयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
