स्मार्ट सिटींत खणप चालूच

भांगरभूंय | प्रतिनिधी

कांपाल वाॅक वेर सांजवेळा अर्दवर बसल्यार वेरें, रेईश मागूशा वटेन पळयल्यार न्हंय अशीर जाता ती दिसता. वयले वाटेन रस्ते रुंद करतात? खोंपींनी चुली पेट्टात? वेरें बेतींचो वाठार कित्याक धुंवरेता? न्हंयंत दिल्लीकार खणचे ना हाचेर नदर कोण दवरतलो?

होमखणा खातीर लिखाण करतना फाटल्या दिसांनी स्मार्ट सिटी पणजेंतल्यो तुटपी, फुटपी पासयो दाखोवन दिल्यो. तुटिल्ल्या, फुटिल्ल्या पासयांक देखणे रुप दिवपाच्या वावराक नेट आयला. रस्त्यांचे बगलेक खणप चालूच आसा, खणपाक बंदी आसुनूय. तुटिल्ल्यो फुटिल्ल्यो पासयो सारक्यो करतना खळयो माती, काँक्रिटा खाला गेल्यात हाची जाणविकाय आसता व्हय? येरादारीक, चलत, भोंवत वतल्यांक आडमेळ्यांतल्यान वाट दाखोवपी पणजेक दारां हजार. मुखेल दारांतल्यान भायर सरतना, येतना वतना ताची अचूक म्हायती, तक्टे देवनागरींतल्यान बेगोबेग करपाक जाय. वेपार वेवसाय, येणावळीचें गोंयच्या राजपाटणांतलें मुखेल दार सुदारपाची येवजण 2025 केंद्रीय अर्थसंकल्पांत आसची. स्मार्ट सिटींच्या वावराकय शीम घालपाची तजवीज जावची.
काल केल्ले रस्ते आयज परतून उस्तुपाची, फोडपाची गरज कित्याक उप्रासता? प्लॅन आनी प्लॅनींग नकाशे इमेजीन पणजी कंपनी कडेन ना? बांदकाम इंजिनियरिंगांत तंत्रगिन्यान, प्लॅनिंगाच्या अभ्यासाचो आस्पाव जाता, ताचो उपेग इंजिनियरांनी करचो. भौशीक बांदकाम, नगरपालिका, म्हापालिका प्रशासन आनी जिल्होधिकारी यंत्रणेत प्लॅनींग आसपाविल्लें दिसना. यंत्रणां मदीं ताळमेळ नाशिल्ल्यान रस्ते आरतून परतून फोडचे पडटात. जिल्ल्हो पावंड्या वेली यंत्रणा रस्ते फोडचे न्हय असो आदेश काडटना तो चालीक लावपा पासत अधिकारी, कामगार आसात. फावो तें गिन्यान तांकां आसा? ताचो नियाळ केल्लो?
2014 वर्सा स्मार्ट सिटीची मुखेल येवजण केंद्राच्या पावंड्यार जाल्ली. गोंय ते येवजणेंत आस्पाविल्लें तेन्नाचे मुख्यमंत्री, आतांचे मुख्यमंत्री, म्हापौर, आमदारय वेगळे. कमिशनर आयज सचीव पांवड्यार पावले तरी तेन्नाचेच. मुख्यमंत्र्यांनी मजगतीं स्मार्ट सिटी पासत दोन बसका घेतल्यो, स्मार्ट सिटीचो बरोच वावर जालो. सगल्या यंत्रणांची बसका वर्सअखेर जावची, नियाळ केल्यार लाव जातलो, फुडार हुंवाराविना वतलो.
स्मार्ट सिटीच्या वावरांत, मुखेलदारार जाल्ल्या पुलांचें कामकाज करपी कंपनीं खळयो बांदपाक, पासयो करपाक आसात? जीं कामां जातात, जावपाचीं आसात ताची म्हायती, जायरात कित्याक जाली ना? एकेच सुवातेर चार पांच फावटी कित्याक फोडाफोड करची पडटा? प्रशासकी यंत्रणा सुस्त जाल्या?
प्रशासनाकय मंत्रीमंडळांत बदल जातलो अशी आस्त आशिल्ली. वर्स सोंपतना म्हूर्त पळयनासतना मंत्री, आमदारां कडेन भासाभास करची. उपरांत म्हूर्त काडून कळाव करिनासतना नव्या मंत्र्यांक सोपूत दिवचो. मुख्यमंत्र्यांक आपले कडेन आशिल्ल्या खात्यांक न्याय दिवपाक मेळपाक जाय. विस्वासांतल्या मंत्र्या कडेन कांय खातीं दिवन, खात्यांक राज्यमंत्री हाडून वजें ल्हव करचें. ताचे खातीर प्लॅनींग जाला आसतलेंच आतां करणी करची. 2027 त 27 मेरेन वचपा पासत तें व्हड पावल आसतलें.
स्मार्ट सिटींतल्या गोंयच्या उजो पालोवपा दळाचे स्मार्ट कचेरेचें उक्तावण जालें. पयलींच्या कार्यालयाचे कितें करतलें? उजो पालोवपाच्या दळाची यंत्रणा प्रशासकी आनी मनीसबळान पुलिसां इतलीच व्हड जाल्या. पुलिसांकय तीं अरिश्टां, संकश्टां वेळार उपेगाक मेळटा. नवें गोंय पोलीस मुख्यालय जातलें? उजो पालोवपी दळाच्या मुख्यालया वरी तें जावं येता, चडांत चड तीन माळ्याचें. पुलीस मुख्यालय, छापणावळ खातें आशिल्ली पासय रोमता, पावसा आदीं ती सारकी जावची. मांडवी न्हंयेचे पोमनेडा लागसारचे पासयेर मात्शी इमेजीन पणजी कंपनी अधिकाऱ्यांनी भोंवडी करची. सेंट झेवियर कूड दर्शनाक आयिल्ले भोंवडेकार सेरेंडीपीटी उत्सवाक येतले, तांचे खातीर स्मार्ट फेरी स्मार्ट पासयेर भरतली? इत्सा आसल्यार फेरयेक नवो जागो मेळटलो, सोदल्यार. नगरसेवकांक घेवन म्हापौर, उपम्हापौरांनी स्मार्ट सिटी कंपनीचे कचेरे मेरेन चलत वचपाक जाय, म्हापालिका इमारती कडल्यान.
पणजी म्हापालिकेच्यो वेंचणुको 2026 वर्सा जावपाच्यो आसात. ताचेआदीं स्मार्ट सिटी खातीर केल्ल्यो चडांत चड येवजण्यो- प्रकल्प जाग्यार घाल्यार सरकाराक लाव जातलो. वेंचणुके आदीं स म्हयने (आॅक्टोबर 2025) स्मार्ट सिटींतलें खणप बंद जावपाकच जाय.
2025 वर्साच्या फेस्ताचे फेरये पासत येवजण जानेवारी 2025 त जातली? वेवस्थापन शास्त्री तेपासत आसात? येवजण शास्त्राक (नियोजन,प्लॅनींग) आयज म्हत्व आसा, फुडाराचें अर्थकारण ताचेर निंबून. फुडार चिंतून नवें नेतृत्व (लिडरशीप) घडयतना एखाद्रें घाळपणा जाता, संख्याबळ चड, उणे आसता तेन्ना आदले सांगाती धांवन कित्याक येवचे नात? पणजी म्हापालिकेची, पंचायत, नगरपालिका वेंचणूक एकाच बराबर जाल्यार ती विधानसभेची सेमी फायनल जातली, गोंय राज्य वेंचणूक आयोग ती दिका ठरयता? प्रभागांचें पुनर्निर्मणेंतल्यान चार नवे मतदारसंघ, नव्यो पंचायती, नगरपालिका जातल्यो तातूंत तिसवाडी तालुको आस्पावतलो?
ओल्ड गोवा वचपाचे वाटेर, पर्वरी म्हापशें रस्त्यार खणटात त्योच कंपनीं स्मार्ट सिटीच्या खणपाच्या वावरांत आसात? वाऱ्याचें प्रदुशण उदकाकय बादता. कांपाल वाॅक वेर सांजवेळा अर्दवर बसल्यार वेरें, रेईश मागूशा वटेन पळयल्यार न्हंय अशीर जाता ती दिसता. वयले वाटेन रस्ते रुंद करतात? खोंपींनी चुली पेट्टात? वेरें बेतींचो वाठार कित्याक धुंवरेता? न्हंयंत दिल्लीकार खणचे ना हाचेर नदर कोण दवरतलो?
स्मार्ट सिटींतल्या पुराय जाल्ल्या प्रकल्पांचेर देखरेख दवरपी यंत्रणा उबारपाक जाय. रातयां एखाद्रो प्रकल्प ना जावपाच्यो, बांदकामां, पासयो सारकें करप अर्दकुट्यो उरपाच्यो घडणुको हे आदीं घडल्यात, आतांय घडूंक येतात. स्मार्ट रस्ते, पासयो करतना, उदकांची पायपां फुट्टात, म्हेळें वेवस्थापन शेणटा. कागाळ भौशीक बांदकाम खातें आयकता? पायपां बदलपा पासत कामगार आसात? पायपांनी माती वता, मातयेर फातर कोण दवरतलो? व्हांवपी उदक कावळे, सुणे, कबुतरां पितात, तेंच उदक वता? नुस्तें तेखातीर मरता? नुस्तेकार चड जाल्लें नुस्तें दर्यादेगांनी उडयतात? इमेजीन पणजी कंपनी कडेन आशिल्ली सीसीटीवी यंत्रणा तें सांगूक शकतली, ते यंत्रणेत कुशळ मनीसबळ आसतलेंच.
राजपाटण पणजी अजून 100 टक्के स्मार्ट जाल्ल्या शारां मदीं पाविल्लें नासलें तरी कोयर वेवस्थापन पासयांचेर जाता. फेरयेवेळार तें शिस्तीन जावपाक जाय, दर्यादेगां वयल्या कोयर वेवस्थापनाक बळ जाय. कुशिल्लें नुस्तें, सुणीं, कावळे, कबुतरां पुरपाक वेगळी वेवस्था जावपाची गरज आसा. स्मार्ट सिटींतल्यान तेखातीर आरंभ जावचो.
स्मार्ट सिटींत खणटना स्मार्ट ई बशींक आडमेळ्यांतल्यान रस्त्यार धांवतात. तांचो वेपारी मार्गार चडांत चड जावपाची येवजण आशिल्ली, व्हड गाडयो 18 जून मार्गार नासच्यो ही मोख दवरिल्ली. तेखातीर पणजेकारां मदीं जागृताय जावची, खोंपींतल्या लोकां मेरेन. नगरसेवकांनी 18 जून मार्गार चलत, स्मार्ट ई बशींनी भोंवचें.

सुहासिनी प्रभुगांवकार
9881099260