भांगरभूंय | प्रतिनिधी
विशेश पुलीस पंगडान कारवारच्यान घेतले ताब्यांत
भांगरभूंय । प्रतिनिधी
पेडणें: मांद्रेंचे आदले सरपंच महेश कोनाडकार हांचेर 4 डिसेंबराक मांद्रेंच्या आस्कावाड्यार बुरखो घातिल्ले टोळयेन खुनी हल्लो करून गाडयेंतल्यान पळून गेल्ले. ह्या सवूय दुबावितांक विशेश पुलीस पंगडान अटक करपाक येस मेळयलें.
महेश कोनाडकार हांचेर खुनी हल्लो करचे खातीर कोणे सुपारी दिल्ली, हे संबंदांत अजून म्हायती मेळूंक ना. पूण ह्या प्रकरणांतल्या सवूय दुबावितांक कारवार कर्नाटकांत विशेश पुलीस पंगडान ताब्यांत घेवन अटक केली.
खुनी हल्लो करपा फाटल्यान जे दुबावीत आशिल्ले, तातूंत विश्वनाथ हरिजन (30. रा. पोरणें गोंय), सुरेश नायक (रा. सुकुर पर्वरी), साईराज गोवेकार (रा. पिळर्ण), फ्रेंकी नादर (रा. सांताक्रूज), मनीष हडफडकार (चोडण) आनी उद्देश शेट्टी (रा. आल्तीन पणजी) ह्या स जाणांक पुलिसांनी अटक केल्या.
खास घडयल्ल्या पुलीस पंगडांत पुलीस सब इन्स्पेक्टर विशाल मांजरेकार, नितीन नायक, नितेश मुळगांवकार, राज परब, प्रणय गांवस, रुपेश आसगांवकार, हरीश पालयेंकार, अनिकेत सावंत आनी मडकयकार हांचो आस्पाव आशिल्लो. दुबावितांनी जीए 08 के 5119 नंबराचे चारचाकी गाडयेन येवन कोनाडकार हांचेर वारांवान खुनी हल्लो केल्लो. ह्या प्रकरणांत पुलिसांनी गाडयेचो धनी पुंडलीक हरिजन हाका अटक केल्ली, पूण हेर स जाण फरार आशिल्ले. ताका लागून पुलिसांचेर व्हड प्रमाणांत थळावे लोक तशेंच थळावे पंचायतीचें चेपण आशिल्लें. हे संबंदांत वेगवेगळ्यो प्रतिक्रिया आयकुपाक येता आसतनाच पुलिसांनी ताकतिकेन सवूय दुबावितांक अटक केले उपरांत आतां कोनाडकार हांकां मारपा खातीर कोणे सुपारी दिल्ली, ताचो तपास आनी तांचे कडल्यान जबानी घेवपाचें काम पुलीस पंगड करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
