एनईपीः पॅशन न्हय मिशन

भांगरभूंय | प्रतिनिधी

सुभाष शिरोडकारः शिक्षणांतल्या बदलाचेर राष्ट्रीय परिसंवाद

भांगरभूंय । खबरां मेज

पणजीः गोंयांत नव्या शिक्षणीक धोरणाची अंमलबजावणी ही फक्त पॅशन न्हय जाल्यार तें एक मिशन आसा. गोंयांत एनईपीची अंमलबजावणी जे तरेन जाता, ताचो विचार केल्यार फुडारांत गोंय एनईपीचे बाबतींत देशा मुखार आदर्श जावपाक शकता, अशें उदकास्रोत मंत्री सुभाष शिरोडकार हांणी सांगलें.

राज्य शिक्षणीक संशोघन आनी प्रशिक्षण परिशदे वतीन (एससीईआरटी) शालेय शिक्षणांतले बदल आनी नव्या राज्य अभ्यासक्रमाचो आराखडो ह्या विशयाचेर दोनापावला राजभवनांतल्या दरबार सभाघरांत आयोजीत केल्ल्या दोन दिसांच्या राष्ट्रीय परिसंवादाच्या समारोप सुवाळ्यांत मंत्री शिरोडकार उलयताले. ह्या वेळार माचयेर गोंयचे शिक्षण सचीव प्रसाद लोलयेंकार, शिक्षण संचालनालयाचे संचालक शैलेश झिंगडे, गोंय शालांत बोर्डाचे अध्यक्ष भगीरथ शेट्ये, गोंय समग्र शिक्षाचे डॉ. शंभू घाडी, एससीईआरटीची संचालक मेघना शेटगांवकार, प्रो. इंद्रायणी भादुरी, प्रो. रामाकृष्णाराव हाजीर आशिल्ले.

गोंयान शिक्षणीक मळार जी उदरगत केल्या, तातूंत सगळ्या घटकांचें योगदान आसा. ह्या परिसंवादांतल्यान जें ज्ञान घेतलां, त्या ज्ञानाचें वितरण करपा खातीर आनी तें चालीक लागचे खातीर वांटो घेतिल्ल्यांनी सगळ्यां मेरेन पावपाक जाय. एनईपीच्या माध्यमांतल्यान आमी फुडारांतलो समाज कसो आसपाक शकता, तें आमी आतां थारावपाक शकतात, ते संबंदांत काम लेगीत करपाक शकतात. एनईपीच्या माध्यमांतल्यान आमी इतिहासीक मानवी संसाधनां तयार करपाक शकतात, अशेंय मंत्री शिरोडकार हांणी सांगलें.

महाराष्ट्र, आसाम, छत्तीसगड आनी गुजरात ह्या राज्यांतल्या नव्या राज्य अभ्यासक्रमाचो आराखडो कशे तरेन चालीक लायतात, हाची म्हायती वळीन कमलादेवी आवटे, डॉ. निरादा देवी, आलोक शर्मा आनी रोहित मेहता हांणी दिली.

पीएम विद्या खाला चालू आशिल्लीं डीटीएच चॅनलां, एससीईआरटीच्या यूट्यूब चॅनलाच्या माध्यमांतल्यान गोंयांतले 5 हजार विद्यार्थी शिक्षकांनी ह्या दोन दिसांच्या राष्ट्रीय परिसंवादाचो लाव घेतलो. प्रा. गोविंदराज देसाय हांणी राष्ट्रीय परिसंवादा विशींचो अहवाल सादर केलो. शंभू घाडी हांणी येवकार दिलो. सहाय्यक प्रा. करुणा सातार्डेंकार हांणी सुत्रसंचालन केलें जाल्यार एससीईआरटीच्या प्रशासकीय विभागाची संचालक सरिता गाडगीळ हांणी उपकार मानले.