गोंयांत दोगां फाटल्यान एकल्याक गोडेंमूत

भांगरभूंय | प्रतिनिधी

चांचणेंतल्यान स्पश्टः देशांत सगल्यांत चड प्रमाण

भांगरभूंय । प्रतिनिधी

पणजीः गोंयांत फाटल्या कांय वर्सां सावन गोडेंमूत आशिल्ल्या दुयेंतींची संख्या सुमारा भायर वाडल्या. गोडेंमूत दुयेंतींचे बाबतींत गोंय देशांत पयले सुवातेर आशिल्ल्याचें भलायकी मंत्रालयान जारी केल्ल्या एका अहवालांतल्यान मुखार आयलां. मंत्रालयान सादर केल्ले आंकडेवारींतल्यान चांचणी केल्ल्या मदीं सुमार 45 टक्के जाणांक गोडेंमुताची लागण जाल्ल्याचें उक्तें जालां.

गोंयांत 30 नोव्हेंबर 2024 मेरेन गोडेमुताच्या दुबावान वट्ट 2,12,598 जाणांची चांचणी केली. तातूंतल्या 90,473 जाणांक गोडेमुताची लागण जाल्ल्याचें निदान जालां. तातूंत चांचणी केल्ल्यां मदीं सुमार 45 टक्के जाणांक तशेंच दोगा फाटल्यान एकल्याक गोडेंमूत आशिल्ल्याचें दिसून येता. ज्या 90,473 जाणांक गोडेंमुताचें निदान जालां, तातूंतल्या 89,950 जाणांचेर हॉस्पिटलांत उपचार चालू आशिल्ल्याचें अहवालांत म्हणलां.

भलायकी मंत्रालयान देशांतल्या 32,33,32,732 जाणांची गोडेंमुताच्या दुबावान चांचणी केल्ली. तातूंतल्या 2,96,26,255 जाणांक गोडेंमूत आशिल्ल्याचें दिसून आयलें. जांच्यो चांचण्यो जाल्यात तातूंतल्या 3,13,97,907 जाणांचेर सध्या उपचार चालू आसात, अशें भलायकी राज्यमंत्री प्रतापराव जाधव हांणी अहवालांतल्यान स्पश्ट केलां.

भारतीय वैजकी संशोधन मंडळान लेगीत गोंया सयत देशभरांत गोडेंमुताच्या दुयेंतींनी वाड जाता अशें स्पश्ट केलां. ते प्रमाण वाडट्या गोडेंमुताचेर नियंत्रण हाडचे खातीर केंद्र सरकारान गरजेच्यो उपाय येवजण्यो आंखपाक सुरवात केल्या. खूबश्या राज्यांनी गोडेमुताच्या दुयेंतींचेर फुकट उपचार करतात. आयुष्मान भारत प्रधानमंत्री जन भलायकी येवजणे खाला अश्या दुयेंतींचेर पांच लाख रुपया मेरेनच्या विम्याचें संरक्षण दितात. गोडेमुता पसून स्वताची राखण करचे खातीर लोकांनी आपले जिणेशैलींत कशे तरेन बदल करचे, हाचें मार्गदर्शन करचे खातीर देशभरांत जनजागृती मोहिमेंचें आयोजन करतात, अशें मंत्री जाधव हांणी म्हणलां. गोडेंमूत दुयेंतींक दितात त्या सुविधा आनी उपचारांत गोंय देंशांत पयले सुवातेर आसा. गोडेंमुताचेर नियंत्रण हाडचे खातीर गोंय वैजकी म्हाविद्यालया वतीन (दोमॅकॉ) गोंयभर जनजाग-ती करता. गोडेंमूत टाळचे खातीर लोकांनी दीसपट्टे जिणेंत कसले कसले बदल करचे, हे संबंदांत गोमॅकॉ आनी भलायकी खात्याच्या कर्मचाऱ्यां वरवीं घराघरांनी वचून जागृताय करतात. गोंयकारांनी जिणेशैली बदल्ली, पुरक आहार घेतलो, व्यायामाचेर लक्ष केंद्रीत केलें जाल्यार गोंयांतल्या गोडेंमूत दुयेंतींचो आंकडो निश्चीत देंवतलो. हे संबंदांत फाटल्या कांय वर्सां सावन आमी करतात त्या यत्नांक येस लेगीत मेळटा, अशें गोमॅकॉचे डीन डॉ. शिवानंद बांदेकार हांणी म्हणलां.

जिणेशैलींत बदल गरजेचेः डॉ. शिवानंद बांदेकार

लोकांचे जिणेशैलींत जाल्ल्या बदलांक लागुनूच गोंयांत गोडेंमूत दुयेंतींची संख्या वाडटा. गोंयांतल्या चडश्या लोकांच्या खावपा- पियेवपाचे पद्दतींत बदल जाला. खूब जाणांनी व्यायामा कडेन पुराय आडनदर केल्या. ताचो परिणाम म्हूण लेगीत गोडेंमूत दुयेंती वाडटात. गोडेमुताक सोरो घेवप लेगीत कारण थारता आनी गोंयांत सोरो पियेवप्यांचो आंकडो चड आशिल्ल्यान गोडेंमुताचे चडांत चड दुयेंती सांपडटात. गोडेंमुताचें दुयेंस आडावपा खातीर लोकांनी सगळ्यांत पयलीं आपले जिणेशैलींत गरजेचे बदल तत्काळ करप गरजेचें आसात, अशें गोमॅकॉचे डीन डॉ. शिवानंद बांदेकार हांणी म्हणलां.