भांगरभूंय | प्रतिनिधी
पणजीः होमगार्डान बरी कामगिरी केल्यार पुरस्कार वा इनामां खातीर शिफारस करपाक जाय अशें मत पुलीस म्हासंचालक आलोक कुमार हांणी उक्तायलां. शुक्रारा पणजेंत 62 व्या होमगार्ड रायजींग डे निमतान आयोजीत केल्ल्या कार्यावळींत ते उलयताले. ह्या संदर्भात पुलीस अधिक्षक एझिल्डा डिसूझा, पुलीस निरिक्षक अजय शर्मा, शर्मिला जुजात, डॉ. विजय परब आनी हेर पुलीस अधिकारी हाजीर आशिल्ले.
गोंयांत नाकाबंदी, व्हड उत्सव वा संकश्टां वेळार, येरादारी वेवस्था सांबाळपाकय होमगार्ड पुलिसां वांगडा काम करतात अशें आलोक कुमार हांणी सांगलें. पूण पुरस्कारा खातीर शिफारशी येता तेन्ना तातूंत होमगार्डाचें नांव नासता. होमगार्डांनी बरी कामगिरी केल्यार तांची पुरस्कारा खातीर शिफारस करची. पुलीस अधिकाऱ्यां वांगडाच तांकां इनामां दिवपाचीय शिफारस करची.
तांणी सांगलें, सध्या गोंयांत 1,500 होमगार्ड पदांक मंजुरी दिल्या. राज्यांतल्या वेगवेगळ्या वाठारांनी वट्ट 1,230 होमगार्ड काम करतात. होमगार्डाचीं 270 पदां रितीं आसात. सध्या हातूंतल्या 143 जाग्यांचेर भरती प्रक्रिया सुरू जाल्या. राज्य सरकारान होमगार्डांक 10 टक्के आरक्षण दिवपाचो निर्णय घेतला. हाचे प्रमाण होमगार्डांक पुलीस हवालदार, जेल गार्ड, अबकारी रक्षक, उजो पालोवपी दळ आनी रान विभाग अशी बडटी मेळूं येता.
1967 वर्सा गोंयांत होमगार्ड सुरू जाल्लो अशें एझिल्डा डिसोझा हांणी सांगलें. होमगार्डाक 1981 वर्सा पूर्णवेळ संघटना म्हूण मान्यताय मेळ्ळी. होमगार्डांक भरती करचे पयलीं वाळपय 45 दिसांचें प्रशिक्षण घेतात. हाचे भायर दर शुक्रारा हांगाच्या जीआरपींत तांची परेड करतात. तांचे खातीर वेगवेगळीं प्रशिक्षण कार्यशाळा घडोवन हाडटात. होमगार्ड आपलें काम निश्ठेन करतले असो आमकां विस्वास आसा.
नाताळ, नव्या वर्सा खातीर पुलीस बंदोबस्त
सेंट फ्रांसीस झेवियर महोत्सवांत गोंय पुलिसांनी बरो कामगिरी केल्या अशें आलोक कुमार हांणी सांगलें. नाताळ, नवें वर्स वा हेर खंयच्याय व्हडल्या उत्सवा खातीर गोंय पुलिसूय तयार आसात. ज्या वाठारांनी चड पर्यटक येतात थंय पुलिसांची बरी उपस्थिती दवरतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
