भांगरभूंय | प्रतिनिधी
-शिक्षण खात्या कडल्यान कर्मचारी भरती आयोगाक प्रस्ताव सादरपणजीः कांय म्हयन्यां आदीं शिक्षण खात्यान सरकारी मुळाव्या आनी माध्यमीक पांवड्यावेल्या शिक्षकांचीं सुमार 350 रितीं पदां भरपा खातीर परिक्षा घेवपाचो प्रस्ताव कर्मचारी भरती आयोगा कडेन सादर केला. ते प्रमाण आयोग टप्प्याटप्प्यान परिक्षा घेतले आनी ते प्रमाण हीं पदां भरतले अशें शिक्षण संचालक शैलेश झिंगडे हांणी आमच्या प्रतिनिधी कडेन उलयतना सांगलें.
सरकारी खात्यांतली ‘क’ वर्गाची रितीं पदां भरपा खातीर राज्य कर्मचारी आयोगान फाटल्या डिसेंबर सावन ही परिक्षा सुरू केल्या. आतां मेरेन आयोगान बारा परिक्षाय घेतल्यात. कांय म्हयन्यां आदीं आयोगान सगल्या खात्याच्या मुखेल्यां कडल्यान रित्यां पदांची वळेरी मागिल्ली. ते प्रमाण सरकारी मुळाव्या आनी माध्यमीक पांवड्या वेल्या शिक्षकांचीं सुमार 350 रितीं पदां भरपाचो प्रस्ताव शिक्षण खात्यान आयोगा कडेन सादर केला. फुडाराक आयोग टप्प्या टप्प्यान परिक्षा घेतले. ते उपरांत हीं पदां भरतले अशें झिंगडे हांणी सांगलें. तशेंच उच्च माध्यमीक पांवड्यार रितीं पदां लोक सेवा आयोगा वरवीं बेगीन भरतले असोय उल्लेख तांणी केला.
…………………………………….
राज्यांतल्या जायत्या सरकारी मुळाव्या आनी माध्यमीक शाळांनी शिक्षकांचो उणाव आसा. ताचो परिणाम विद्यार्थ्यांच्या शिक्षणाचेर जावपाक लागला. थंय शिकपी जायते विद्यार्थी खाजगी शाळांनी वचपाक लागल्यात म्हणून सरकारी मुळाव्यो शाळा बंद जावपाक लागल्यात. हाचेर नियंत्रण दवरपा खातीर शिक्षण खात्या कडल्यान बेगिनांत बेगीन सुमार 350 शिक्षकांची भरती करपाचे यत्न सुरू आसात अशी म्हायती सुत्रांनी दिली.
…………………………………….
जायत्या जाणांचें सपन जातलें पुराय
राज्यांतल्या जायत्या तरणाट्यांचें शिक्षक जावपाचें सपन शिक्षण खात्याच्या ह्या निर्णयाक लागून पुराय जातलें. ह्या पदां खातीर कर्मचारी भरती आयोगान केल्ल्या परिक्षांक पयलीं भशेन तांचे कडल्यान आपशींच प्रतिसाद मेळपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
