भांगरभूंय | प्रतिनिधी
सुरत, खबरां संस्था: गुजरात पुलिसांनी सुरतांतल्या बनावट वैजकी पदवी दिवपी गटाक अटक केली. हो गट फाटलीं ३२ वर्सां फकत ७० हजार रुपयांक उण्या शिकिल्ल्या बेकारांक बनावट पदवी दिवपा खातीर वावुरतालो. नोंदणी नूतनीकरणा खातीर पांच हजार रुपया शुल्क घेताले. हातूंत एक बनावट दो. शमीम अंसारी हांचोय आस्पाव आसा. विशेश म्हणल्यार हाच्याच चुकीच्या उपचाराक लागून एके चलयेक मरण आयलें. ह्या प्रकरणांत आतां मेरेन वट्ट १४ जाणांक अटक केल्या.
ह्या सिंडिकेटांतले दोग मुखेल आरोपी डॉ. रमेश गुजराथी आनी बी के रावत हांचे कडल्यान पुलिसांनी शेंकड्यांनी अर्ज आनी प्रमाणपत्रां जप्त केल्यांत. आतां मेरेन ह्या गटान १२०० जाणांक बोगस वैजकी पदव्यो तयार करून दिल्ल्यो हे विशीं पुलिसांक कळटांच तांणी पांडेसराच्या ३ हॉस्पिटलांचेर धाड घाली. तांचे कडल्यान बॅचलर ऑफ इलेक्ट्रो होमिओपॅथी मेडिसिन आनी सर्जरीचें प्रमाणपत्र सांपडलें. पुराय चवकशी केले उपरांत तांकां दिल्ल्या प्रमाणपत्राचेर गुजरात सरकाराची मान्यताय नाशिल्ली. पुलिसां वांगडा धाड घालपाक गेल्ल्या पंगडानय ही पद्वी बनावट आसा अशें सांगलें.
ह्या प्रकरणांतले मुखेल दुबावीत डॉ. रमेश गुजराथी हांणी १९९० त बीएचएमएसचें शिक्षण घेतिल्ल्याची कबुली पुलिसांक दिली. तो जायत्या ट्रस्टांनी गेस्ट लेक्चरर म्हणून काम करतालो. पूण, जेन्ना ताचो चडसो फायदो जावंक ना तेन्ना तांणी इलेक्ट्रो होमिओपॅथीची स्वताची कॉलेज सुरू करपाचो निर्णय घेतलो. गुजराथी हांणी २००२ त गोपीपुरा भागांत कॉलेज सुरू केलें, पण विद्यार्थी उणे आशिल्ल्या तें ती कॉलेज बंद पडली. भारत सरकार वा राज्य सरकारान इलेक्ट्रो होमिओपॅथी खातीर कसलेच नेम लागू करूंक नाशिल्ल्यान तांणी एक सिंडीकेट करून रावत हाचे वांगडा बोगस पदव्यो दिवपाचो धंदो सुरू केलो.
गोंयांतूय घडिल्लो असो प्रकार
बोगस शिक्षणीक प्रमाणपत्रां दिवन तरणाट्यां कडल्यान लाखांनी रुपया वसूल करपाचो रॅकेट गुन्यांव फांट्यान उक्ताडार हाडलो. पुलिसांनी हे टोळयेंतल्या ५ जाणांक धरले आनी तातूंत बनावट प्रमाणपत्र वापरून सरकारी नोकरी मेळिल्ल्या मनशाचोय आस्पाव आशिल्ल्याचें उक्तें जालें. वायलेट खांडेपाल ऑफ ग्रेस एज्युकेशन हे बोगस संस्थे वतीन ही बनावट प्रमाणपत्रां दिताले. ही संस्था चालोवप्याचो सोद पुलीस घेतात. ह्या बनावट शिक्षणीक प्रमाणपत्राच्या आधारार जायत्या जाणांनी सरकारी, तशेंच खासगी आस्थापनांनी नोकरी मेळयल्ल्याचो प्रकारूय हे टोळये कडल्यान उक्ताडार आयिल्लो.
मजगतीं, पणजे वायलेट खांडेपाल ऑफ ग्रेस एज्युकेशनाचें कार्यालय २०२० वर्सा सुरू केलें. ह्या कार्यालया वरवीं विवीध शिक्षणीक संस्थांच्या नावान बोगस प्रमाणपत्रां दिताले. हो प्रकार गुन्यांव फांट्याच्या पुलिसांच्या निदर्शनाक आयले उपरांत मंगळारा (ता. १२ तारीख) विवीध सुवातांचेर छापो घालून सगळ्या दुबावितांक अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
