भांगरभूंय | प्रतिनिधी
पणजी : शिक्षण, शेती, कुशळटाय उदरगत ह्या विशयाचेर मार्गदर्शन केले उपरांत मुख्यमंत्री डॉ. प्रमोद सावंत फाल्यां वजन आनी माप खात्याचीं कामां आनी उपक्रमा विशीं वेबिनारा वरवीं मार्गदर्शन करतले. फाल्यां शेनवारा सकाळीं ९.३० वरांचेर हो वेबिनार जातलो, अशी म्हायती वजन आनी माप सचीव रमेश वर्मा हांणी पत्रकार परिशदेंत दिली. वजन आनी माप खातें भेसळ वा वजनांत फेरफारीचे वर्साक सुमार ७०० गुन्यांव नोंद करता, अशें तांणी सांगलें.
मुख्यमंत्री खासा करून आप मजत गटांचे वांगडी तशेंच पंच, सरपंचा कडेन संवाद सादतले. पॅकेजिंग उद्देगाचेर वेबिनारांत भर आसतलो. पॅकेजिंग उत्पादक म्हूण ६७३ आप मजत गटांची नोंदणी जाल्या. पॅकेजिंग वेवसायाक राज्यांत बरो वाव आसा. जे कोण पॅकेजिंग वेवसायांत आसा तांची खात्याकडेन १०० टक्के नोंदणी जावपाक जाय. गिरायकांचे हक्क सांबाळपा खातीर वजन आनी माप खातें करपी कामां, खात्याची जापसालदारी हाचेरूय मुख्यमंत्री डॉ. प्रमोद सावंत उलयताले. आप मजत गट तशेंच लोकांनी दुबाव आसल्यार ते मांडपाची संद मेळटली, अशें सचीव रमेश वर्मा हांणी सांगलें.
कागाळी वा दुबाव आसल्यार ९४०३३०१९७७ ह्या नंबराचेर संपर्क सादचो, अशें खात्यान कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
