भांगरभूंय | प्रतिनिधी
फोंडें: फोंडें पालिकेन शारांतली बेशिस्त पार्किंग समस्या सोडोवपा खातीर १ जानेवारी सावन पे पार्कींग करपाचो निर्णय घेतला. ताका लागून शुक्रारा नगराध्यक्ष आनंद नायक हांच्या मार्गदर्शना खाला शारांतल्या विवीध भागांची संयुक्तपणान पळोवणी केली.
शारांत मेळटा थंय गाडयो पार्कींग करतात. ताचो त्रास सामान्य लोकांक जाता. म्हणून फोंडें पालिकेन शुक्रारा विवीध भागांची पळोवणी करून जानेवारी म्हयन्या सावन पे पार्कींग करपाचो निर्णय घेतला. नगराध्यक्ष आनंद नायक, नगरसेवक रूपक देसाय, पालिका निरीक्षक विशांत नायक आनी हेर अधिकार्यांनी फोंडें पुलीस निरीक्षक विजयनाथ कवळेकार हांची भेट घेवन चर्चा केली. शारांत बेशिस्तपणान गाडयो पार्कींग करतात. ताका लागून पे पार्किंगा खातीर लागपी सगळें सहकार्य करपाचें आस्वासन पुलीस निरीक्षकान दिलें.
हे विशीं चड म्हायती दितना नगराध्यक्ष नायक हांणी पुलीस स्टेशनाचे कुशीक आशिल्ले सुवातेरूय पे पार्कींग करतले. ताका लागून अपघातांत सांपडिल्लीं वाहनां कुशीक करपा खातीर निरीक्षक कवळेकार हांची भेट घेवन चर्चा केली. ते सुवातेर आशिल्लीं अपघातग्रस्त वाहनां कुशीक करपाचें आस्वासन मेळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
