भांगरभूंय | प्रतिनिधी
श्रीहरिकोटा, खबरां संस्था ः भारतीय अंतरिक्ष संशोधन संघटनेन (ISRO) प्रोबा-3 मिशन लाँच केलें. श्रीहरिकोटा सावन सतीश धवन अंतराळ केंद्रांतल्यान बिरेस्तारा सांजवेळा 4:04 वरांचेर पोलर सॅटेलाइट लाँच वेहिकल (PSLV) वरवीं हें मिशन सुरू केलें. तें युरोपीय स्पेस एजन्सीचें (ESA) आसा. कोरोनग्राफ आनी ऑकल्टर ह्या दोन उपग्रहां वरवीं सूर्याच्या भायल्या वातावरणाचो अभ्यास करप हो ताचो हेत आसा.
दोनूय उपगिरे एकामेकां पसून 150 मीटर अंतराचेर रावतलें. दोनूय उपगिरे धर्तरेच्या लंबवर्तुळाकार कक्षेत भोंवडी करतले. धर्तरेसावन तांचें चडांत चड अंतर 60,530 किमी आनी दुसरें उण्यांत उणें अंतर सुमार 600 किमी आसतलें. हे कक्षेंत दोनूय उपगिरे 150 मीटर अंतराचेर आसतले आनी ते एका युनिटा प्रमाण काम करतले.
ऑकल्टर उपगिऱ्यात सूर्याची तेजस्वी डिस्क आडावपाखातीर तयार केल्ली 1.4 मीटर लांबायेची डिस्क आसा. हाका लागून कृत्रीम सूर्यग्रहण जाता. हे सावळेंत कोरोनाग्राफ उपगिरो आपल्या दुर्बिणींतल्यान सौर कोरोनचें निरिक्षण करतलो.
० सौर वादळ आनी कोरोनल मास इजेक्शन सयत अंतरिक्षांतल्या हवामाना विशीं आपली समज वाडोवप हे प्रोबा-3 चें मुखेल ध्येय आसा.
० ह्या मिशनांत अंतराळ संस्थेक दोन उपग्रहां वरवीं ताच्या एडवांस्ड फॉर्मेशन-फ्लाइंग टेक्नोलॉजीजचें प्रमाणीकरण करपाचे आसा.
० प्रोबा-3 वरवीं कोरोन सूर्याच्या पृश्ठा परस कित्याक चड गरम आसा आनी सौर वारें कशें तीव्र जाता हें शास्त्रज्ञ जाणून घेवपाक सोदतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
