भांगरभूंय | प्रतिनिधी
नवी दिल्ली, खबरां संस्था: पुजास्थान कायदो १९९१ च्या कायदेशीर वैधतेक आव्हान दिवपी याचिकेचेर आयज सर्वोच्च न्यायालयांत सुनावणी जाली ना. सरन्यायाधीश संजीव खन्ना, न्यायमूर्ती पीव्ही संजय कुमार आनी न्यायमूर्ती मनमोहन हांच्या तीन न्यायाधीशांच्या खंडपीठान ह्या प्रकरणाचे सुनावणे पयलींच बाजू मांडली.
१९९१ वर्सा केल्ल्या ह्या कायद्याक हिंदू पक्षान आव्हान दिलां. कायद्या प्रमाण १५ ऑगस्ट १९४७ पयलीं स्थापन जाल्ल्या खंयच्याय धर्माच्या पुजेस्थानाचें रुपांतर हेर खंयच्याच धर्माचे उपासनेचें थळ करपाक मेळना. ह्या प्रकरणांत आतां मेरेन सर्वोच्च न्यायालयांत वट्ट स याचिका दाखल जाल्यात. ह्या सगळ्या याचिकांचेर आयज सर्वोच्च न्यायालयांत एकठांय सुनावणी जातली. हिंदू वटेनच्या याचिकादारांत विश्वभद्र पुजारी पुरोहित महासंघ, सुब्रमण्यम स्वामी आनी अश्विनी उपाध्याय हांचो आसपाव आसा. मुस्लीम पक्षाच्या वतीन जमियत उलेमा- ए- हिंद कोर्टांत पावल्यात.
‘‘उपासना थळां कायदो १९९१ अघटीत आसा अशी आमी मागणी करतात. वादग्रस्त पुजास्थळांच्या प्रकरणांत न्यायालयांत वचपाचो अधिकार काडून घेतात. हातूंत कट ऑफ तारीख १५ ऑगस्ट १९४७ आसा. हें बदलून वर्स ७१२ करपाक जाय, जेन्ना मुहम्मद बिन कासिमान पयलीं हल्लो केलो आनी भारतांतलीं हजारांनी देवळां नश्ट केलीं.’’
पुजास्थान कायदो-१९९१ कितें सांगता?
१९९१ त तेन्नाचे प्रधानमंत्री पी व्ही नरसिंह राव हांच्या कॉंग्रेस सरकारान पुजास्थान कायदो केलो. १५ ऑगस्ट १९४७ पयलीं अस्तित्वांत आयिल्ल्या खंयच्याय धर्माची पुजेची सुवात हेर खंयच्याच धर्माची पुजास्थानांत रुपांतरीत करपाक मेळना अशें कायद्यांत म्हणलां. कोणाकूय तशें करपाचो यत्न केल्यार ताका एक ते तीन वर्सां बंदखण आनी दंड भरचो पडटा. त्या वेळार अयोध्या प्रकरण न्यायालयांत आशिल्ल्यान तें ह्या कायद्या भायर दवरिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
