भांगरभूंय | प्रतिनिधी
म्हजें मत
पावसाळो सुरू जावचे आदीं वीज खातें माॅन्सूनपूर्व कामां करपाचीं आसात म्हणून वरांचींवरां लायट बंद दवरता. तशें गिरायकांक कळयतायबी. ‘गैरसोयी खातीर दिलगीर आसात’ अशेंय वीज खातें सांगता. पावस सुरू जातकच आमकां अखंडपणान लायट मेळटली हे आशेन आमी लायटीविणें रावतात, गैरसोय सोंसतात. आपापलीं कामां कुशीन दवरतात. सरकारी लायटीचेर विस्वास नाशिल्ले कांय शाणे मनीस इन्व्हर्टर सुरू करून आपलीं गरजेचीं कामां भागयतात.
पूण, खंय गा! पावसाची एकूच सर आयल्यार पुरो, लायट पक्क करून वता आनी बेगीन येवपाचें नांव घेना. लायटीच्या आॅफिसांत फोन केल्यार फोन एंगेज मेळटा. लोकांची कटकट नाका म्हणून ते फोन काडून दवरतात खंय. खरें फट देवूच जाणा! फोन चुकून लागलोच जाल्यार येतली लायट, फाॅल्ट सोदतात अशी जाप मेळटा. लायटीचे केबल अंडरग्रावण्ड करूनूय लायट कशी वता हें कुवाडें म्हाका अजून सुटूंक ना. आदीं पावस आनी वारें आयलें की लायट गेलीच हें थारिल्लेंच आसतालें. कारण वारें येतकच झाडां हुमटून लायटीच्या सरयांचेर पडटालीं आनी वीज पुरवण बंद जाताली. भुंयगत केबल घालुनूय तेंच?
बरें, एक वेळ पावस आनी वारें येतकच लायट वता हें समजूं येता. पूण ह्या दिसांनी पावसूय ना आनी वारेंय ना तरी लायट वता. अर्द- अर्द वर येना. लायट कोण काडटा, कित्याक काडटा हाची जाप मेळना. वीज मंत्री सुदिन ढवळीकार हांणी तरी हाची जाप दिवची आनी आमचें समाधान करचें.
– अभिराम पां. गायतोंडे
आकें – मडगांव
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
