भांगरभूंय | प्रतिनिधी
पंचायती कडल्यान अनवळख्यां आड कागाळ; गुन्यांव नोंद करपाची मागणी
म्हापशें: नास्नोळ्यां फुटबॉल मैदाना कुशीक मेकळे सुवातेंत सोऱ्याच्यो बाटल्यो फोडून उपद्रव करपी अनवळख्यां आड पंचायतीन पुलीस कागाळ केल्या. संबंदितां आड गुन्यांव नोंद करून कारवाय करची अशी मागणी हे कागाळीत केल्या.
हो प्रकार लोकांचे नदरेंत आयले उपरांत पंचायत मंडळाक म्हायती दिली. मैदानाचे कुशीक व्हड प्रमाणांत बियर आनी हर सोऱ्याच्यो बाटल्यो फोडिल्ल्यो. सरपंच फ्रेडी फर्नांडी, हांचे सयत पंचायत सचीव रंजना रावूळ, पंच वांगडी सतीश गोवेकार, नीलेश केरकार, गांव विकास समितीचे निमंत्रक देविदास नेतार्डेकार आनी हेर ग्रामस्थांनी घडणूक थळार धांव घेवन पळोवणी केली, आनी खर निरशेणी उक्तायली. तशेंच म्हापशें पुलिसांक आपयलें. उपरांत पंचायतीन ह्या प्रकरणाची म्हापशें पुलिशेंत कागाळ नोंद केल्या.
फाटल्या दोन वर्सां सावन नास्नोळें पंचायती कडल्यान हे विशीं आवाज काडटात. म्हापशें पुलिसांक खूबशीं पत्रां बरोवन गस्त आनी भौशीक सुवातेर सोरो पियेवप्यांचेर कारवाय करपाची मागणी वेळावेळार केल्या. पूण सोऱ्याच्यो बाटल्यो फोडप्यांचेर पुलिसां कडल्यान अजून कसलीच कारवाय जायत नाशिल्ल्यान पंचायतीन निरशेवणी उक्तायल्या.
सरपंच फ्रेडी फर्नांडीस हांणी म्हणलें, आमी हो प्रस्न खूबशा तेंपा सावन मांडत आसात. पूण कसलीच कारवाय जायना. म्हापशें पुलिसांक आमच्या मैदाना कुशीक जायत आशिल्ल्या विवीध उपद्रव्यां विशीं पत्रां बरयल्यांत. पूण आयज मेरेन कसलीच कारवाय जाल्ली ना. ताका लागून ह्या प्रकारांनी वाड जाल्या.
आयतारा दिसा तरणाटे मैदानार येवन खेळटात. तातूंतले कांय जाण ह्यो सोऱ्याच्यो बाटल्यो फोडून वतात. ह्या प्रकरणांत गुन्यांकारी कृत्यां करप आनी गांवांतलो सलोखो इबाडपाचो यत्न करपाच्या आरोपा खाला गुन्यांव दाखल करून कारवाय करची अशी लेखी कागाळ आमी पुलिसां कडेन केल्या. पुलिसांनी ह्या कागाळी कडेन आडनदर केल्यार मुख्यमंत्र्या कडेन दाद मागतले अशी शिटकावणी फर्नांडीस हांणी दिली.
पंच वांगडी सतीश गोवेकार हांणी सांगलें की, हालींच जाल्ले पंचायत मंडळाचे बसकेंत आमी गांवांत नव्या बार्राक वा व्हायन स्टोराक परवानगी दिवचे नात असो थाराव घेतला. कारण गांवांत खूबशीं आस्थापनां आसात. गांवांतल्या व्हायन स्टोर्सांनी तांच्या वेळाक पाळो दिवन वेवसाय करचो. नेमांचें उल्लंघन जाल्यार परवान्याचें नुतनीकरण न करपा सारकी गंभीर कारवाय पंचायत करतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
