मुख्यमंत्री म्हूण गोंयांत येतलो ही वावडी

भांगरभूंय | प्रतिनिधी

राजेंद्र आर्लेकारः बिहारांत खोशी

भांगरभूंय । प्रतिनिधी

पणजीः आपूण बिहारांत खोशी आसा. थंय आपलें काम लेगीत बरें चल्लां. आपूण अदीं मदीं गोंयांत येतां. मात मुख्यमंत्री म्हूण गोंयांत येतलों, ही फकत वावडी सा. तातूंत कसलेंच तथ्य ना, अशें मत बिहारचे राज्यपाल राजेंद्र आर्लेकार हांणी उक्तायलें. बिरेस्तारा पणजे विवेकानंद केंद्र गोंय आयोजीत एके कार्यावळींत आर्लेकार हांणी वांटो घेतिल्लो. ते उपरांत तांणी प्रसार माध्यमां कडेन संवाद सादलो.

ते आदीं जाल्ले कार्यावळींत आर्लेकार हांणी सांगलें, भारताचो आत्मो हो अध्यात्म आसा. प्राचीन काळांत खूबश्या विचारवंतांनी आपली अध्यात्म, परंपरा हाचेर विचार करून दवरिल्लो. स्वामी विवेकानंद हांणी लेगीत तेन्नाच्या भारता खातीर गरजेची अध्यात्मीक फांटभूंय तयार करून दवरिल्ली. भारत स्वतंत्र जाले उपरांत आमी त्या मार्गान वचप अपेक्षीत आशिल्ले. संवसारभरांतल्या खूबश्या देशांक स्वतंत्र भारत संवसाराक वेगळो अध्यात्मीक विचार दितलो, अशें दिशिल्लें, मात दुर्दैवान अशें जावंक ना.

तेन्नाच्या राजकी नेतृत्वान आमचे कडल्यो गजाली घेवचे परस हेर देशांतल्यो गजाली घेतल्यो. इल्लो साम्यवाद, इल्लो समाजवाद, इल्ली भांडवलशाय अश्यो गजाली घेतल्यो. ही त्या वेळा वयली राजकी नेतृत्वाची शोकांतिका आशिल्ली. तांणी आपलो स्वता देश, परंपरा, संस्कृती, इतिहास सोडून दुसरे कडेन प्रेरणा सोदली. हे खातीर तेन्नाचें राजकी नेतृत्व बेकार थारलें. आयज आमी ही मानसिकता सोडून नवे पिळगेक तांचे भाशेंत समजतलें, अशे पद्दतीन स्वामी विवेकानंद सांगपाक जाय, अशें आर्लेकार हांणी सांगलें.

राष्ट्रीय शिक्षण धोरणाक लागून आमची नाळ परतून मातये कडेन जुडटली. आमी खूबशीं वर्सां वसणूकवादी मानसिकता आशिल्ली शिक्षण प्रणाली चालीक लायताले. मॅकोले ह्या ब्रिटीश नागरिकान तयार केल्लें शिक्षण घेताले. हे खातीर लेगीत 1947 उपरांतभारताक हेर देशां कडेन पळयत बसचें पडलें. विकसीत भारत 2047 त फकत अर्थीक उदरगत अपेक्षीत ना. तातूंत समाजीक, वैचारीक उदरगत लेगीत अपेक्षीत आसा, अशें आर्लेकार हांणी सांगलें.

आई-बाबा वचून मम्मी- डॅडी

ब्रिटीश शिक्षण पद्दतीक लागून आमचे मदीं लेगीत खूबशे बदल जाले. घरांत आई, बाबा, काका, मामा ह्या उतरांचे सुवातेर आतां मम्मी, डॅडी, अंकल, आंटी अशीं उतरां आयल्यांत, अशें राज्यपाल राजेंद्र आर्लेकार हांणी सांगलें.