भांगरभूंय | प्रतिनिधी
खबरां संस्था
मुंबयः वेंचणूक निकाला उपरांत 13 दिसांनी महाराष्ट्रांतलें नवें सरकार सत्तेर आयलें. देवेंद्र फडणवीस हांणी 10 वर्सांत तिसरे खेपे मुख्यमंत्रीपदाचो सोपूत घेतलो. अशें करपी ते भाजपाचे पयले फुडारी आसात. सोंपूत घेतले उपरांत प्रधानमंत्री नरेंद्र मोदी हांणी तांकां परबीं दिलीं.
फडणवीस हांचे उपरांत आदले मुख्यमंत्री एकनाथ शिंदे हांणी उपमुख्यमंत्रीपदाचो सोपूत घेतलो. सोपूत घेवचे पयलीं तांणी बाळासाहेब ठाकरे आनी आनंद दिघे हांचें नांव घेतलें. प्रधानमंत्री मोदी आनी अमीत शाह हांचे उपकार मानले. ते राज्याचे दुसरे फुडारी जे मुख्यमंत्री उपरांत उपमुख्यमंत्री जाल्यात.
शिंदे हांचे उपरांत राष्ट्रवादी काँग्रेस पक्ष फुडारी अजीत पवार हांणी उपमुख्यमंत्रीपदाचो सोपूत घेतलो. ते सवे खेपे राज्याचे उपमुख्यमंत्री जाल्यात. ते महायुती आनी महाविकास आघाडी दोनूय आघाडी सरकारांत उपमुख्यमंत्रीपदार आशिल्ले महाराष्ट्रांतले पयले फुडारी जाल्यात.
सोपूत सुवाळ्याच्या अर्द वरा उपरांत फडणवीस, शिंदे आनी पवार मंत्रालयांत गेले. थंय पयली मंत्रीमंडळाची बसका घेतली.
फडणवीस हांणी सोपूत घेतले उपरांत पुणेचे दुयेंती चंद्रकांत शंकर कुरहाडे हांकां उपचारा खातीर मुख्यमंत्री उपचार मजत निधींतल्यान 5 लाख रुपयांची मजत दिवचे खातीर सय केली.
सोपूत सुवाळो मुंबयच्या आझाद मैदानाचेर सांजेच्या 5.31 वरांचेर सुरू जालो. तो सुमार 30 मिण्टां चल्लो. राज्यपाल सीपी राधाकृष्णन हांचे मुखार तिगूय फुडाऱ्यांनी मराठींत सोपूत घेतलो.
सोपूत सुवाळ्याक प्रधानमंत्री मोदी, अमीत शाह, नितीन गडकरी हांचे सयत नितीश कुमार, चंद्रबाबू नायडू, एनडीए शासीत 20 राज्यांचे तशेंच केंद्रशासीत प्रदेशांचे मुख्यमंत्री आनी उपमुख्यमंत्र्यांनी वांटो घेतलो. सुवाळ्यांत मुख्यमंत्री आनी दोनूय उपमुख्यमंत्री सोडले जाल्यार हेर एकाय मंत्र्याक सोपूत दिवंक ना. महायुती मदीं मंत्रीमंडळ वांटपांत 6-1 चो फॉर्मुला तयार केला. म्हणल्यार 6 आमदारांचेर एक मंत्रीपद मेळटलें. हाचे खाला भाजपाक 20 ते 22 मंत्रीपदां, एकनाथ शिंदे गटाक 12 आनी अजीत पवास गटाक 9 ते 10 मंत्रीपदां मेळपाक शकतात.
डॉ. प्रमोद सावंत हांचे उपस्थिती
साधनसुविधांची उदरगत आनी समाजीक बदलांचेर भर दिवपी महाराष्ट्रांतलें डबल इंजीन सरकार राज्याक उदरगतीच्या मार्गार व्हरतलें. मुख्यमंत्री देंवेंद्र फडणवीस, उपमुख्यमंत्री एकनाथ शिंदे आनी अजीत पवार हांच्या सोपूत विधी सुवाळ्याक हाजीर रावप आपले खातीर खोशयेचो खीण आसा, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
