भांगरभूंय | प्रतिनिधी
म्हापशें: निल्ला आडवो आयिल्ल्या सुण्याक स्कुटरीचो धपको बसले उपरांत फाटल्यान बशिल्ल्याक टँकराच्या टायरां सकयल आयिल्ल्यान मरण आयलें. वनलाल दुहपुईआ (२६, रा. मूळ मिझोराम) अशें मरण आयिल्ल्या तरणाट्याचें नांव. जाल्यार दुचाकी चलोवपी जेम्स वनलालिन (२६, रा. मूळ मिझोराम) हो जखमी जालो.
हो अपघात बिरेस्तारा सकाळीं ६.४५ वरांचेर घडलो. जखमी आनी मरण आयिल्लो तरणाटो जीए ०३ एएल ८०९४ नंबराचे दुचाकी वेल्यान कांदोळेच्या पर्वरे वटेन वताले. निल्ला पंचायती लागसारा तांचे स्कुटरी मुखार अचकीत एक सुणो आयलो. ह्या सुण्याक धपको बसले उपरांत जेम्स हाचें दुचाकी वेलें नियंत्रण वचून वनलाल हो रस्त्याचे विरुद्ध दिकेन पडलो. तेन्ना थंयच्यान वचपी जीए ०२ व्ही ९०९९ नंबराच्या टँकराच्या फाटल्या टायरा पोंदा तो सांपडलो आनी ताका जाग्यारूच मरण आयलें. टँकर घेवन ड्रायव्हर जागोनाथ सरदार (३५, रा. मूळ अस्तंत बंगाल) हो कांदोळे वटेन वतालो.
अपघाताची म्हायती मेळटांत पर्वरे पुलीस घडणुके सुवातेर पावले. जखमीक ऍम्बुलन्सींतल्यान व्हरून हॉस्पिटलांत दाखल केलो. अपघाताचो पंचनामो पुलीस उपनिरीक्षक प्रजित तुळसकार आनी हवालदार सुभाष गांवस हांणी केलो. फुडलो तपास पुलीस करतात.
मजगतीं, पर्वरेच्या एका कॅसिनोंत हे दोगूय तरणाटे कामाक आशिल्ले. तांचे कुडीची चावी कांदोळे रावपी ताच्या इश्टाचे कुडीचेर उरिल्ली. ती हाडपा खातीर ते दोगूय गेल्ले. थंयच्यान परत येतना तांकां हो अपघात जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
