भांगरभूंय | प्रतिनिधी
पणजी : राज्यांतल्या विद्यार्थ्यांची १०० टक्के अपार नोंदणी जावची म्हणून दर म्हयन्याचे ९ आनी १० तारखेर अपार नोंदणी दीस आयोजीत करपाचो निर्णय शिक्षण खात्यान घेतला. दर म्हयन्याचे ९ आनी १० तारखेक विद्यार्थ्यांनी पोर्टलाचेर विद्यार्थ्यांची म्हायती भरून अपार आयडी तयार करची, असो उलो शिक्षण खात्यान केलां. हाची सुरवात ९ आनी १० डिसेंबर सावन जातली.
विद्यार्थ्यांची शिक्षणीक उदरगत आनी कारकिर्दीची नोंद जावची ह्या हेतान ऍटोमेटेड पर्मनंट ऍकेडेमीक एकावंट रजिस्ट्री (अपार) तयार करपाचो निर्णय सरकारान घेतला. एकादो विद्यार्थी खंयच्या राज्यांत आनी खंय शिक्षण घेता, ताचो सोदूय फुडाराक घेवपूय अपार आयडीक लागून शक्य जातलें. सगळ्या विद्यार्थ्यांनी अपार नोंदणी करची, असो उलो शिक्षण खात्यान मारला. विद्यार्थी आनी पालकांनी गरजेची म्हायती दिवन शिक्षकांक अपार नोंदणी खातीर सहकार्य करचें अशें कळयलां.
एक देश, एक विद्यार्थी नोंदणी मोहीमे खाला १२ आंकडो आशिल्लो आंकडो विद्यार्थ्यांक दितात. हाका लागून शिक्षण खात्याक विद्यार्थ्याचे शिक्षणीक उदरगतीचो नियाळ घेवप शक्य जातलें. शिक्षणीक प्रमाणपत्रां, हेर प्रमाणपत्रां, गुणपत्रिका डिजीलॉकरांत स्टोर करून दवरप विद्यार्थ्यांक शक्य जातलें. हाचो फुडाराक विद्यार्थ्यांक प्रवेशा खातीर तशेंच नोकरे खातीर लाव जातलो. अपार नोंदणे विशीं जागृतताय करपाक शिक्षण खात्यान जायते उपक्रम हातांत घेवपाची म्हायती शिक्षण संचालक शैलेश झिंगडे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
