भांगरभूंय | प्रतिनिधी
फोंडें: कृषी खातें पिकांचे लागवडी खातीर शेतकारांक जायत्यो सवलती दिता. मात पयशांच्या हांयसाक बळी पडून शेतकारांनी आपल्यो शेत जमनी विकच्यो न्हय असो उलो कृषी मंत्री रवी नायक हांणी मारलो. फोंड्यां संवसारीक मातये दिसा निमतान आयोजीत कार्यावळींत मंत्री उलयताले. ह्या वेळार संचालक संदीप फळदेसाय, सहाय्यक संचालक किशोर भावे, सहाय्यक संचालक संगीता वेळीप, कृषी अधिकारी राजेश डिकिस्ता आनी कृषीरत्न पुरस्कार जैतिवंत हेमंत सामंतमाचयेर हजर आशिल्ले.
पूर्वजांच्यो जमनी तिगोवन दवरपाक तरणाट्यांनी तांची लागवड करपाची गरज आसा. रानांतलीं जनावरां पिकांची नासाडी केल्ल्यान खात्या वतीन शेतकारांक लुकसाण भरपाय दितात. राज्यांतल्या सगळ्या म्हालांतल्या कृशी अधिकार्यांनी म्हालांत सगळ्यांत चड जमनींची लागवड करपाक शेतकारांक मार्गदर्शन करचें. ताका लागून कृषी अधिकार्यांक पयलें १ लाख, दुसरें ५० हजार आनी तिसरें २५ हजार रुपयांचीं इनामां दितले, अशेंय मंत्री नायक हांणी सांगलें.
ह्या वेळार संदीप फळदेसाय हांणी विचार मांडले. किशोर भावे हांणी येवकार दिलो जाल्यार संगीता वेळीप हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
