भांगरभूंय | प्रतिनिधी
नवी दिल्ली, खबरां संस्था ः संवसारांतली सगळ्यांत व्हडली क्रिप्टोकरन्सी बिटकॉयनान पयलेच खेपे एक लाख डॉलर ($1 लाख) आंकडो हुंपला. आयज 5 डिसेंबराक बिटकॉयन 7 टक्क्यां वयर वाडून $102,585 (रु. 86.91 लाख) विक्रमी उंचायेचेर पावलो. फाटल्या म्हयन्यांत डोनाल्ड ट्रम्प हांणी अमेरिकेंतल्या वेंचणुकेंत जैत मेळयल्या उपरांत बिटकॉयनांत वाड जायत आसा.
फाटल्या एका वर्सांत बिटकॉयनाचें मोल 118% वाडल्या. वर्सा आदीं म्हळ्यार 6 डिसेंबर 2023 दिसा $43,494 (रु. 36.85 लाख) आशिल्ली, जी आतां $102,585 (रु. 86.91 लाख) इतली जाला. आतां क्रिप्टोकरंसींतल्यान मेळपी जोडीचेर 30% कर भरचो पडटलो. हाचे भायर क्रिप्टोकरंसी वापरून केल्ल्या वेव्हाराचेरूय 1% टीडीएस वसूल करतले. त्याच वेळार क्रिप्टोकरंसी भेट दितना लेगीत 30% कर भरचो पडटलो.
क्रिप्टो चलन म्हणल्यार कितें?
क्रिप्टोकरंसी ही ऑनलायन पेमेंट करपाची पद्दत आसा. वस्तू आनी सेवा हांचे पयशे दिवपा खातीर ताचो उपेग करतात. क्रिप्टो चलन हें नेटवर्क आदारीत डिजिटल चलन आसा. खंयचीय कंपनी वा व्यक्ती टोकन स्वरुपांत ती जारी करूंक शकता. हे टोकन फकत जारी करपी कंपनीचो म्हाल आनी सेवा खरेदी करपा खातीर वापरतात.
खंयच्याय एका देशाच्या चलनाभशेन ताचेर नियंत्रण दवरूंक मेळना. ताचें पुराय ऑपरेशन ऑनलायन आसता, देखून तांतूत उतार- चडाव जाता. संवसारांतलें पयलें क्रिप्टोकरंसी बिटकॉयन हें 2009 वर्सा ओपन सोर्स सॉफ्टवेअर म्हणून प्रसिद्ध जाल्लें. ताची निर्मिती करपी पंगडाक सातोशी नाकामोटो ह्या नांवान वळखतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
