भांगरभूंय | प्रतिनिधी
मडगांव, प्रतिनिधी ः मडगांव पालिकेचो महसुल वैयक्तीक फायद्या खातीर वापरपी फरारी आशिल्लो मडगांव पालिकेचो एलडीसी योगेश शेटकार हाका मडगांव पुलिसांनी बिरेस्तारा मडगांव रेल्वे स्टेशन वाठारांतल्यान अटक केली.
मडगांव पालिके वतीन आयोजीत केल्ल्या पुरमेंताचे फेस्ताचो सोपो कर एकठांय करपाची जापसालदारकी एलडीसी योगेश शेटकार हाका दिल्ली. मजगतीं, तांणें हे सोपो कराचे पयशे युपीआय वरवीं आपल्या वैयक्तीक खात्यांत जमा केलें. नगराध्यक्ष दामू शिरोडकार हांकां लागून ही गजाल उजवाडाक आयली. पालिका मंडळान आपयिल्ले खाशेले बसकेंत हे विशीं कायदेशीर सल्लो घेवन फुडली कारवाय करपाचो निर्णय घेतिल्लो.
कायदेशीर औपचारीकताय पुराय जातकच पालिकेचे मुखेली गौरीश शंखवाळकार हांणी मडगांव पुलीस स्टेशनांत फेस्ताच्या आयोजना कडल्यान मेळिल्ल्या सोपो कर येणावळीच्या 17.96 लाख रुपयांची भानगड जाल्ल्याची कागाळ दाखल केली. दोन दिसांनी दुबावीत योगेश शेटकार हांचे आड मडगांव पुलिसांनी गुन्यांव नोंद केलो. एक म्हयनो जालो तरी दुबावीत मेळूंक नाशिल्ल्यान पुलिसांनी योगेशा आड लुकआउट नोटीस जारी केली.
मजगतीं, योगेशान ऑगस्टांत केल्ली आनीक एक भानगड उजवाडाक आयली. वायफाय बिल भरपा खातीर पालिके कडल्यान 17,500 रुपयाचो चेक काडिल्लो तो ताणें आपल्या बँक खात्यांत भरिल्लो. सध्या पुलीस निरिक्षक तुळशीदास नायक हांच्या फुडारपणा खाला ह्या प्रकरणांची चवकशी सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
