भांगरभूंय | प्रतिनिधी
वाळपय: सत्तरी म्हालांत मॉडिफायड गाडयो वाडत आसात. आतां मेरेन तांचेर कारवाय जावंक ना. हाका लागून येवपी काळांत असल्या गाडयांचेर कारवाय करपाची मोहीम चालीक लायतले. कोणाचेंच चुरचुरें करचे ना. कर्कश हॉर्नांक लागून जायत्या जाणांक त्रास जातात. असल्याय गाडयांचेर कारवाय करतले, अशी म्हायती दिवचलचे उपाधिक्षक जीवबा दळवी हांणी दिली. वाळपय पत्रकार परिशदेंत तांणी ही म्हायती दिली.
बुधवारा वाळपयच्या दोन सुवातांचेर परवानो नाशिल्ल्या दोन मोटारींचेर कारवाय केल्ली. हातूंत विद्यार्थ्यांचो आसपाव आशिल्लो. उपरांत ह्या विद्यार्थ्यांच्या पालकांक वाळपय पुलीस स्टेशनाचेर आपोवन शिटकावणी दिली. दुसरे फावट परवान्या बगर दुचाकी वा मोटार चलयतना दिसल्यार पालकांचेर कडक कारवाय करपाची शिटकावणी पुलिसांनी दिल्या.
सत्तरी म्हालांत वट्ट बारा ग्रामपंचायती आनी एक नगरपालिका आसा. ह्या सगळ्या वाठारांनी मॉडिफायड गाडयो दिसतात. मोटारसायकलींचे सायलन्सर काडून जाल्यार चार चाकी गाडयो मॉडीफायड करून रस्त्यांचेर भोंवतात. असल्यो कागाळी वाडल्यात. हें सगळें बेकायदेशीर आशिल्ल्यान तांचेर कारवाय करपाची मोहीम सुरू केल्या. अशी म्हायती दळवी हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
