भांगरभूंय | प्रतिनिधी
फोंडें : खुरसाकडे- उसगांवां सुमो जिपीक फाटल्यान वेगान धांवपी गाडयेचो धपको बसून गाडयेंतले दोग जाण जखमी जाले. हातूंत गाडी चालक साकिब मुक्तावतार शेख (२०, उसगांव) आनी अयाम मुक्तावतार शेख (१७, उसगांव) ह्या दोगूय भावांचो आसपाव आसा. सध्या जखमींक उपचारा खातीर गोमॅकोंत दाखल केल्यात. ह्या अपघातांत धारबांदोडेंच्या कृषी खात्याचे सुमो गाडी ड्रायव्हर आनी अधिकार्याक कांयच जावंक ना. फोंडें पुलिसांनी अपघाताचो पंचनामो केलो.
मेळिल्ले म्हायती प्रमाण, सुमो नंबर जीए – ०७- जी – १३०४ घेवन चालक अधिकार्याक घेवन पणजे वताली. खुरसाकडे- उसगांवां पावताच फाटल्यानच्यान वेगान धांवपी जीए – ०२- एस – १५१४ गाडयेचो धपको सुमोक लागलो. हातूंत गाडी चालक आनी कुशीक बशिल्लो तरणाटो जखमी जालो. अपघाता वेळार पिळयें भलायकी केंद्रांतल्यान एके जाण्टे बायलेक गोमेकाॅत व्हरपी १०८ ऍम्बुलन्सींतल्यान जखमींक उपजिल्लो हॉस्पिटलांत व्हेले. अपघाताची म्हायती मेळटांच फोंडें पुलिसांनी घडणुके सुवातेर वचून पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
