भांगरभूंय | प्रतिनिधी
म्हजें मत
मडगांवचें श्रीदामबाबालें घोडें दर वर्सा दिंडे निमतान दिंडी पथक सर्त आयोजीत करता. दिंडी पथकांनी केल्लो श्रीहरिनामांचो गजर आनी टाळ- मृदंगाचो स्वर खरेंच आयकुपा सारको आसता अशें मडगांवचीं आमचीं सोयरीं सदांच आमकां सांगतालीं, पूण मडगांवची दिंडी आनी दिंडी पथकांचो नाच पळोवपाचो योग येनासलो. अंदूं सगलीं कामां कुशीक दवरून मडगांवचे दिंडेक कशींय करून याच असो निर्धार केलो आनी मडगांवां गेलीं.
कोंबांतल्या श्रीविठ्ठल मंदिरांत वचून श्रीविठ्ठल रखुमाईचें दर्शन घेतलें. मंदिरांत आनी मंदिरा भायर भक्तीभावाचें वातावरण आसलें. मन प्रसन्न जालें. पूण, आमकां दिंडी पथकां पळोवपाचो ध्यास लागिल्लो. म्हणून थंय वेळ काडिनासतना आमी सोमती मडगांवच्या गार्डना कडेन आयलीं. रातचीं सुमार आठ वरां जाल्लीं. आमकां सगल्यांकूच दिंडी पथकांचो नाच पळोवपाची उमळशीक लागिल्ली. आमी गार्डना कडेन आयलीं, पूण एकूय दिंडी पथक येवंक नासलें. माचये वयले पदाधिकारी तांचीच वाट पळयताले. आमी वेळ पासार करपा खातीर पालिके कडेन पणटी सजावट सर्त पळोवंक गेलीं. पूण थंयूय आमची निराशा जाली. हे सर्तींत वांटो घेतिल्ले सर्तक तेन्नाच पणटी मांडटाले.
आमी परत गार्डना कडेन आयलीं. एकेक दिंडी पथक येतालें. दिंडी पथकांचो नाच पळोवन या अशें मनांत म्हणून आमी थंयच मातसो वेळ रावलीं. इतल्यान गडगड मारून पावस पडलो. थांबच ना. अखेरेक आयोजकांक ही सर्त रद्द करची पडली. मुळांत ही दिंडी पथकांची आनी पणटी सजावट सर्त इतली उसरां घेवंकूच जायना. आतां तरी आयोजक शाणे जातले काय? फुडल्या वर्सा तरी ही सर्त बेगीन सुरू करतले काय?
– सत्यविजय पां. पटेकर
सावंतवाडी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
