भांगरभूंय | प्रतिनिधी
पणजी ः केंद्र सरकारान पर्यटन उदरगत येवजणे खाला राज्य सरकाराक 188.21 कोटी रुपयांचे व्याजा बगर रीण मंजूर केल्या. हांतूतले 97.47 कोटी रुपया खर्च करुन फोंड्यां ‘छत्रपती शिवाजी महाराजांचेर आदारीत डिजिटल म्युझियम’ उबारतले. तशेंच पर्वरी ‘टावन स्क्वेअर’ प्रकल्पा खातीर 90.74 कोटी रुपया मंजूर केल्यात. हे येवजणे वरवीं पुराय देशांतल्या 40 पर्यटन थळांची उदरगत करतले.
फार्मागुडेच्या किल्ल्या लागसार डिजिटल म्युझियम उबारतले. पीपीपी तत्वाचेर ह्या प्रकल्पांत किल्ल्याचेय नूतनीकरण करतले. संग्रहालयांत अत्याधुनिक तंत्रगिन्यान वापरिल्ले परस्परसंवादी प्रदर्शन आसतलें. हांगाच्या अभिनव कथाकथन तंत्रा वरवीं छत्रपती शिवाजी महाराजांच्या जिवितांतले म्हत्वाचे खीण पळोवंक मेळटले. तशेंच मराठा साम्राज्याची भव्यताय अणभवपाक मेळटली.
पर्वरी हांगाच्या टावन स्क्वेअर प्रकल्पांत पार्किंग सुविधा, वॉचटॉवर, संगीत फव्वारे सयत मुळावी बांदावळ आनी वेगवेगळे आकर्शण आसतलें. तातूंत सांस्कृतीक कार्यशाळा, सादरीकरणां आनी गोंयचें संगीत, नाच, कला आनी खाणां-जेवणाचे प्रकार दाखोवपी प्रदर्शनांचो आस्पाव आसतलो. परस्पर संवादात्मक अणभव आनी कार्यावळींच्या एकीकरणाक लागून पर्यटकांक याद उरपी सांस्कृतीक अणभव मेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
