भांगरभूंय | प्रतिनिधी
तेल अवीव, खबरां संस्था: इझ्रायलाक मशिदींच्या लावडस्पिकरा वेल्यान जावपी अजानाचेर बंदी घाल्या. संरक्षण मंत्री इटामार बेन गवीर हांणी पुलिसांक मशिदींत लायिल्ले लावडस्पिकर जप्त करपाचे आनी आवाज केल्यार दंड दिवपाचे निर्देश दिल्यात.
‘टायम्स ऑफ इझ्रायल’च्या खबरां प्रमाण, पूर्व जेरुसलेम आनी हेर जायत्या वाठारांतल्या मशिदींतल्यान व्हड आवाज येता, अश्यो कागाळी लोकांनी केल्यात.
लावडस्पीकर बंदीची मागणी करप्यांच्या म्हणण्या प्रमाण, लावडस्पिकरांचो व्हड आवाज सकाळचे न्हिदेंत आडमेळें आडटा. बेन गवीर हांणी पुलीस कमांडर्सांक सांगलें, ते बेगीनूच एक अशें विधेयक सादर करतले जाका लागून बोवाळ करपी मशिदींवेलो दंड वाडटलो.
ह्या निर्णया आड इझ्रायलांत निशेद जावंक लागला. कांय शारांतल्या महापौरांनी सांगलें, आमी बेन ग्वीरचें हें पावल मुस्लिमां आड शिटकावणी म्हणून पळयतात, हाका लागून दंगली जावपाक शकतात. बेन ग्वीर हांची गणना इझ्रायलच्या सगळ्यांत कडव्या फुडार्यां मदीं करतात. आपल्या वादग्रस्त वक्तव्यांक लागून ते जायते फावट चर्चेंतूय आसतात.
इझ्रायलाक ज्यू आनी अरबां मदीं सहकार्य वाडोवपाचें काम करपी अब्राहम इनिशिएटिव्ह ऑर्गनायझेशनानूय लावडस्पीकर बंदीक विरोध केला. संघटणेन म्हणलां, पुलिसांचो वापर करून राजकारण करपाचो हो येत्न आसा. देशांत गुन्यांवकार मेकळेपणान भोंवतना बेन ग्वीर पुलिसांचो राजकी हत्यार म्हणून वापर करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
