भांगरभूंय | प्रतिनिधी
म्हापशेंः घाट्येश्वरनगर, खोर्लेच्या शिवा कुडणेंकर हांच्या घराक उजो लागून सुमार २ लाखांचे लुकसाण जालें. ही घडणूक मंगळारा सकाळीं ११ वरांचेर घडली.
कुडणेंकार कुटूंब घर बंद करून लागींच सोयर्यांचे हळदीक गेल्लीं. उपरांत अचकीत घराचे पयले माळेक उजो पेटलो. फ्रिजाच्या कॉम्प्रेसरांत शॉर्ट सर्कीट जावन हो उजो लागिल्ल्याचो अदमास आसा. घरांतल्यान धुंवर आयिल्ल्याचें कळटकच कुडणेंकार कुटूंबान घडणुके सुवातेर धांव मारली. दार उघडून शेजार्यांचे मजतीन उजो पालोवपाचो यत्न केलो. उज्यान आनीक नेट घेतलो. उपरांत पुराय घरांत धुंवर पातळ्ळो.
हे घडणुकेची म्हायती मेळटांच म्हापशें उजो पालोवपी दळाच्या जवानांनी हांगा पावन दोन बंबांचे मजतीन उजो पालयलो. ह्या उज्यांत फ्रीज, टिव्ही, खाट आनी हेर समान लासून सुमार २ लाखांचें लुकसाण जालें.
उजो पालोवपी दळाचे हवालदार विष्णू गांवस, योगेश आमोणकार, सनील बाणावलीकार, चंद्रकांत नायक, प्रविण गांवकार, गोविंद देसाय आनी अमोल सातार्डेंकार ह्या जवानांनी उजो नियंत्रणांत हाडलो. घडणुकेची म्हायती मेळटांच थळावे नगरसेवक विराज फडके हांणी येवन पळोवणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
