भांगरभूंय | प्रतिनिधी
पणजी ः बार्देस कोंकणी अस्मिताय केंद्रान ज्येश्ठ कवी सर्गेस्त प्रकाश पाडगांवकार हांचे 76 व्या जयंती निमतान कला आनी संस्कृती संचालनालयाच्या बहुउद्देशीय सभाघरांत फाल्यां, 4 डिसेंबराक सांजेच्या 4 वरांचेर खाशेली कार्यावळ आयोजीत केल्या. हे कार्यावळींत 15 ते 35 वर्सां पिरायेंतल्या कवीं खातीर घेतिल्ले कोंकणी कविता सर्तीच्या जैतिवंत कवींक इनामां भेटयतले.
ह्या वेळार “म्हाका आवडलेली कविता” ह्या माथाळ्या खाला निमंत्रीत कवींचे कविता वाचन जातलें. हांतूत डॉ. शंकुतला भरणे, प्रकाश नायक, गौरीश वेर्णेकार, नयना आडारकार, शशिकांत पुनाजी, प्रीती पाडगांवकार वांटो घेतलीं. कार्यावळींत मुखेल सोयरी म्हूण डॉ. किरण बुडकुले हाजीर आसतलीं. अध्यक्षस्थान ज्येश्ठ कवी माधवबाब बोरकार भुशयतले. संजीवी पाडगांवकार खास आमंत्रीत म्हूण हाजीर आसतली.
ह्या वेळार सर्तीचे परीक्षक डाँ. पूर्णानंद च्यारी आनी राधा भावे हांचो भेटवस्तू दिवन भोवमान करतले. हे कार्यावळीक व्हडा संख्येन कोंकणी मोग्यांनी हाजीर रावचें असो उलो केंद्राची अध्यक्ष अनघा कामत, सचीव सुचेता पै आनी संयोजक नूतन साखरदांडे हांणी मारलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
