धारगळ धगधगता

भांगरभूंय | प्रतिनिधी

मात, सगल्यांनी समजिकायेन, शांत तकलेन हें प्रकरण हाताळचें. कोणाक लागून तरी गांवांतलो एकचार, वातावरण दुशीत जावंक नाका. संगीत महोत्सव येतले वतले, गांवकारांक थंयच रावपाचें आसा.

अखेरेक सनबर्नाचें घोडें गंगेंत न्हालें. म्हणल्यार बऱ्याच यत्ना उपरांत ह्या संगीत महोत्सवाक एकदाची परवानगी मेळ्ळी. पूण, खऱ्या अर्थान काट्यांचो मार्ग आतां सुरू जातलो. हो महोत्सव धारगळे जाता. पूण, ताचे वयल्यान गांवांत दोन गट पडल्यात. सनबर्नाक लागून सध्या धारगळ धगधगता, अशें म्हणल्यार अतिताय थारची ना. विरोधी गट म्हणटा, परतून ग्रामसभा आपयात. सगल्या लोकांनी हय म्हणलें जाल्यारूच सनबर्नाक परवानगी दितले. नाजाल्यार तो जाताच कसो तें पळयतां. कांय जाणांनी तर भितर घुसून तो बंद उडयतले. थळाव्या आमदाराचो आमकां पुराय तेंको आसा, अशेंय म्हणलां. थोडे धारगळकार न्यायालयांतूय वचपाक सोदतात. हाचे पयलीं जाल्ले ग्रामसभेंत सनबर्नाक विरोध जाल्लो. तरीय धारगळ पंचायतीची बसका जाली. मागीर मतदान जालें. तातूंत सनबर्न परवानगेचो थाराव पांच आड चार मतांनी संमत जालो. ताचेरूय विरोधकांनी प्रस्न उपस्थीत केल्यात. आतां मुखार कितें जाता तें 1- 2 दिसांनी कळटलेंच.
सनबर्न महोत्सव हो संवसारांतल्या व्हडल्या संगीत महोत्सवां मदलो एक. पयल्या 15 महोत्सवां मदीं (इलेक्ट्राॅनीक डॅन्स म्युझीक फेस्टिव्हल- इडीएम) ताचो क्रमांक लागता खंय. गोंयांत तो 2007 सावन जाता. उद्देगपती शैलेंद्र सिंह हांणी तो सुरू केलो. 2015 मेरेन तो गोंयांत जालो. पयलो कांदोळे दर्यावेळेर. 2016 वर्सा तो पुण्यां गेलो आनी 2019 त परतून गोंयांत परतलो. कारण पर्यटकांक गोंयचें आकर्शण आसा, तशें हेर कडलें ना. कार्ल कोक्स, एक्स्वेल, डेव्हीड गुएटा, दिमित्री वेगा अशे जायते गायक, डिजे, संगीत पंगड तातूंत वांटो घेतात. संवसारांत पयल्या, दुसऱ्या क्रमांकाचेर आशिल्ले गायक मात हातूंत दिसूंक नात, तरीय युवा पिळगी सनबर्न म्हणलें की सामकी पिसावल्ले भशेन जाता. ह्या महोत्सवाच्या वाठारांत, संगीतान (?) बेहोश जाल्ल्या 1- 2 तरणाट्यांक मरण पसून आयलां. खंयच्यान तरी तिकेटी, पास मेळोवन ह्या संगीत महोत्सवाक वचप अशी जायत्या जाणांची सर्वोच्च म्हणटात तशी इत्सा आसता. ताकाच लागून ह्या महोत्सवाक लाख ते देड लाख रसीक येतात. तेन्ना विदेशी संगिताचे विरोधक पसून रातच्या काळखांत गुपचूप थंय गेल्ले कोणाक दिसले जाल्यार अजाप धरचें न्हय.
संगीत महोत्सवाक लागून लोकांची गर्दी, खेटाखेट जातली. येरादारीचें वजें गांवाचेर पडटलें. कोंयडीय जावं येता. थळाव्यांक आनी महोत्सवाक येवप्यांक हाचो मनस्ताप जातलो. आवाजाचो त्रास जातलोच. कारण हो महोत्सव रातचो 10 वा 12 वरांचेर बंद जावचो ना. फांतोड मेरेन तो चलूं येता. कोयर, लायट, उदकाचीय समस्या येवंक शकता. पंचायतीक मान मोडीसर वावराक लागचें पडटलें. साधनसुविधांचेर ताण येवचो ना, हें तांकां पळोवचें पडटलें. तांचे परस चड जापसालदारकी पुलिसांचेर आसतली. गोंयांत नव्या वर्साच्या निमतान खूब संगीत महोत्सव जातात. तातूंत पर्यटक, गोंयकार रातभर धुंद जावन नाचतात. ह्या वेळार घुंवळे वखदांक हुंवार येता अशें कांय जाण म्हणटात. तर थोड्यांच्या मतान नाखुटभर पसून ड्रग्स हांगा कोण घेनात. हांगाय दोगांची दोन मतां. पूण कितेंय आसलें वा जालें तरीय संगीत महोत्सवांची क्रेझ मात पसून उणी जावंक ना. सनबर्न सारक्या व्हडल्या ईडीएमाची तर चडूच.
परवानगी दिवप्यांचे हात ओले जाल्यात, असो धारगळच्या सनबर्न विरोधकांचो दावो. दुसरे वटेन सरपंच म्हणटात, आमचेर कोणाचेंच चेपण ना. सरकाराच्या नेमा प्रमाण आमी परवानगी दिल्या. थळाव्यांक थंय स्टाॅल घालपाक मेळटले, टॅक्सी, पायलटांक रोजगार मेळटलो, पंचायतीक येणावळ मेळटली. सनबर्न आयोजक कंपनीन पंचायतीक कोयराचो ट्रक दिता अशें सांगलां खंय. तशी उलोवणी जाल्यात, अशेंय सरपंचान सांगलें. 3- 4 दिसां पयलीं थळाव्या आमदाराचे उपस्थितींत लोकांनी सनबर्नाक विरोध केल्लो. आमदारानूय आपूण लोकां वटेन रावतलों अशें उतर दिल्लें. संस्कृती रक्षकांनीय महोत्सवाक विरोध केल्लो. आतां धारगळ पंचायतीच्या निर्णया उपरांत ह्या सगल्यांचें म्हणणें कितें आसा, तें कळटलें. ग्रामसभा जाता काय ना, तेंय कळटलें. खुबळिल्ल्या लोकांचो विरोध कायम तसोच उरता काय 19 डिसेंबरा पयलीं ते तातूंतल्यान मुक्त जातात, तेंय समजतलें. मात, सगल्यांनी समजिकायेन, शांत तकलेन हें प्रकरण हाताळचें. कोणाक तरी लागून गांवांतलो एकचार, वातावरण दुशीत जावंक नाका. संगीत महोत्सव येतले वतले, गांवकारांक थंयच रावपाचें आसा. सनबर्नाक लागून गांवकारांच्या नात्यां मदीं कोडसाण येवची न्हय.