भांगरभूंय | प्रतिनिधी
19 वर्सां पिराये सकयले आशिया करंड क्रिकेट सर्तींत काल सोमारा जाल्ले मॅचींत भारत पंगडान जपान पंगडा आड 211 अशा व्हडा फरकान जैत जोडलें. भारताचें सर्तींतलें पयलें जैत थारलें. पयले मॅचींत ताका पाकिस्ताना आड हार घेवची पडिल्ली. ह्या जैतान भारताची सेमी फायनलींत सुवात मेळोवपाची आस्त कायम उरल्या.
जपान पंगडान टॉस जिखून भारताक पयलीं बॅटींग करपाचें आमंत्रण दिलें. भारतान निर्धारीत 50 ओव्हरींनी 6 विकेटी व्हगडावन 339 धांवड्यो केल्यो आनी उपरांत जपानाचो डाव 50 ओव्हरींनी 8 बाद 128 धांवड्यांचेर आडायलो. भारतान बरी सुरवात केली. ओपनर बॅट्समनांनी पयले विकेटी खातीर 65 धांवड्यांची भागिदारी केली. आयुष म्हात्रेन जबरदस्त बॅटींग करतना फकत 29 बॉलांनी 54 धांवड्यो केल्यो. वैभव सूर्यवंशीन 23 धांवड्यांचें योगदान दिलें. ताच्या उपरांत आंद्रे सिद्धार्थान 35 धांवड्यांचें योगदान दिलें.
ते उपरांत मुखेली मोहम्मद अमानान भारताचो डाव मुखार व्हरपाक सुरवात केली. मोहम्मद अमान आनी केपी कार्तिकेय हांणी मेळून चवथे विकेटी खातीर 122 धांवड्यांची भागिदारी केली. मोहम्मद अमानान 118 बॉलांनी 7 चवक्यांचे मजतीन 122 धांवड्यो केल्यो. ताणें एकोडे आनी दोट्टी धांवड्यांचेर अदीक भर दिलो. ताचे खेरीत केपी कार्तिकेयनान 57 धांवड्यो केल्यो.
अखेरच्या ओव्हरींनी भारतान वेगान धांवड्यो करपाच्या यत्नांत कांय विकेटी व्हगडायल्यो. हार्दिक राजान 12 बॉलांनी 25 धांवड्यो केल्यो. ताचे खेरीत निखिलान 12 धांवड्यो केल्यो. हरवंश पंगालिया (1) हाका सोडलो जाल्यार सगल्या बॅट्समनांनी दोट्टी आंकडो हुपलो.
जपाना वतीन काटो सॅफर्डान 84 धांवड्यो दिवन 2, ह्युगो केलीन 42 धांवड्यांनी 2 विकेटी घेतल्यो.
मोखीचो फाटलाव करपी जपानाक 8 विकेटी व्हगडावन 128 धांवड्यो करप शक्य जाल्यो. ह्युगो केलीन सगल्यांत चड 50 धांवड्यो केल्यो. ताचे खेरीत चार्ल्स हिंज हाणें 35 आनी निहार परमारान 14 धांवड्यो केल्यो. भारता वतीन केपी कार्तिकेयान 2, हार्दिक राजान 2, चेतन शर्मान 2 आनी युधाजीत गुहान एक विकेट घेतली.
भारत आपली निमाणी सांखळी मॅच संयुक्त अरब अमिराता आड 4 डिसेंबराक खेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
