भांगरभूंय | प्रतिनिधी
दोट्टी रेलमार्गा विशीं सरपंचान भुमिका बदलिल्ल्याचो आरोप
भांगरभूंय । प्रतिनिधी
वास्कोः दोट्टी रेलमार्गा विशींची वेळसांवची ग्रामसभा आरोप- प्रत्यारोपांनी गाजली. वेळसांवची सरपंच मारिया गौव्हेला हांणी दोट्टी रेलमार्गा विशींची भुमिका बदलून मोवसाणीचें धोरण आपणायलां, असो आरोप कांय लोकांनी केलो. जाल्यार आपले भुमिकेंत कसलोच बदल जावंक ना, अशें सरपंच मारिया हांणी सांगलें. आमी लोकांक त्रास जावपाक दिवचे नात आनी दोट्टी रेलमार्गाचें समर्थनूय करचे ना, अशें तांणी स्पश्ट केलें.
वेळसांवची ग्रामसभा आयतारा 1 डिसेंबराक जाली. हे बसके सरपंचा सयत हेर पंच, सचीव हाजीर आशिल्ले. बसकेत दोट्टी रेलमार्गा विशीं चर्चा जावपाची आशिल्ल्यान थळाव्यो लोकांनी व्हड प्रमाणांत हाजेरी लायिल्ली. तातूंत सरपंचाचे भुमिकेचें समर्थन करप्यांची संख्या चड आशिल्ली.
सरपंचाचे भुमिकेक समर्थन दिवचे खातीर तांकां मुद्दाम हाडिल्ले. आमचो आवाज चेपपाचो खेळ केला, असो दावो आदले पंच रोकोझीन डिसोझा आनी तांच्या समर्थकांनी केलो.
गांवचे लोक हुशार आसात. ते खातीर ते योग्य मार्गान लढो दितात, असो दावो सरपंच मारिया आनी ग्राम विकास समितीचे ओर्वील दोरादो हांणी केलो.
दोट्टी रेलमार्गाक विरोध आसा हे संबंदांत सरपंच मारिया तशेंच ग्राम विकास समितीन कांयच म्हणूंक ना, असो दावो डिसोझा हांणी केलो. पंचायती उच्च न्यायालय, सर्वोच्च न्यायालयांत दाखल केल्ल्यो याचिका भायर मारल्यात. हाची म्हायती लोकांक कित्याक दिवंक ना? आतां पंचायत आनी आमी उदरगतीच्या विरोधांत ना. आमकां शाश्वत उदरगत जाय. हे संबंदांत रेल विकास निगम लिमिटेडा कडेन चर्चा करतात, हे सारकें अजाप ना. ते लोकांक फटयतात, अशें तांणी सांगले. लोकांक कसलीय अडचण आसल्यार तांणी कुठ्ठाळी आमदारा कडेन येवचें, असो सरपंचान उलो मारलो. सरपंच मारिया हांणी विरोधकांचे सगळे आरोप न्हयकारले. दोट्टी रेलमार्गा संबंदांत निर्णय घेवपाचो अधिकार पंचायतीक ना. सर्वोच्च न्यायालयांतल्यो याचिका भायर मारल्लयात. लोकांनी आपल्यो कागाली ग्राम विकास समिती कडेन मांडिल्ल्यो. ताका लागून परंपरीक उदकाची वाट आडोवप, आवाज, हवेच्या प्रदुशणा संबंदांत शाश्वत उदरगती विशीं आमी रेल विकास निगम लिमिटेडाक पत्र बरयल्लें. आमी कसलेंच मोवसाणीचें धोरण आपणावंक ना. आमी रेल विकास निगम लिमिटेडाक कसलोच ना हरकत दाखलो दिवंक ना. पंचायतीची कसलीच जमीन ना आनी ना हरकत दाखलो दिवपाचो अधिकार लेगीत पंचायतीक ना. रेल विकास निगम लिमिटेडान योग्य नियोजन करचें. लोकांच्यो समस्या सुटाव्यो करपा संबंदांत उपाय येवजण करची, अशी आमी मागणी केल्या. रेल विकासान नीस मारपाक सुरवात केले उपरांत आमी तांचे कडेन आराखडो मागिल्लो, पूण तांणी आमकां वेळसांव बदला कांसावले संबंदांतली कागदपत्रां दाखयल्लीं. तीं घेवपाक आमी स्पश्ट न्हयकार दिलो, अशें सरपंचान सांगलें.
लोकांची दिशाभूल करची न्हयः ओर्वील दोरादो
डिसोझा आनी तांचे समर्थक दोट्टी रेलमार्गा संबंदांत पुराय म्हायती दिनासतना लोकांची दिशाभूल करता. ताका लागून चडशे लोक आमचे वटेन आसासत. ग्राम विकास समितीन कांयच चुकीचें करूंक ना. लोकांच्या हिता खातीर सगळे एकठांय येवया. कोळसो, दोट्टी रेलमार्ग नाका हे खातीर आमी न्यायालयीन तशेंच हेर मार्गान लढो दितात. ताका लागून संबंदितांनी गरजे भायर फटीचे आरोप करून गांवांतली शांतताय इबाडची न्हय, असो उलो ग्राम विकास समितीचे ओर्वील दोरादो हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
