भांगरभूंय | प्रतिनिधी
मंत्री सुभाष फळदेसाय : वाडें- कुर्डीच्या उदरगतीच्या कामांचें उक्तावण
सांगें : प्रधानमंत्री कृषी सिंचन येवजणेच्या धा कोटी रुपयांतलो एक रुपया जर हांवें खाल्ला आनी तशें सिद्ध केल्यार हांव आमदार आनी मंत्रिपदाचो राजिनामो दिवन घरा बसपाक तयार आसां. मात, कारणा बगर म्हजेर आरोप करचे न्हय. कोणाचेर विस्वास दवरप हें मतदारांनी थारावचें, अशें निवेदन सांगेंचे आमदार आनी मंत्री सुभाष फळदेसाय हांणी वाडें- कुर्डी केलें.
आमदार थळावी उदरगत येवजणे खाला वाडें कुर्डीच्या सरकारी हायस्कुला मुखार ४७ लाख रुपया खर्चून सोबितीकरण आनी दुरीग बांदलां. ताचें उक्तावण मंत्री फळदेसाय हांचे हस्तुकीं जालें.
आयज सांग्यांर कोट्यांनी रुपयांचीं उदरगतीचीं कामा सुरू आसात. उदरगतीच्या मळार सांगें मतदारसंघांत कामां जायत रावतलीं, अशें मंत्री फळदेसाय हांणीं मुखार सांगलें.
ह्या वेळार एसटी वित्त आनी उदरगत महामंडळाचे अध्यक्ष वासू मेंग गांवकार, सरपंच प्रज्योत गांवकार, उपसरपंच आंतोनेता निगेरो, कार्यकारी अभियंतो एल्वीस डिसोझा, सहाय्यक अभियंतो बेंटो मास्कारेन्हास, मुख्याध्यापिका गांवकार, पालक- शिक्षक संघाची अध्यक्ष लता गांवकार, रीमा गांवकार, सरपंच चंद्रकांत गांवकार, बुंडो वरक आनी पंचायत वांगडी हजर आशिल्ले.
प्रधानमंत्री कृषी सिंचन येवजणे खाला जाचो अर्ज स्विकारपाचो उरला जाल्यार तो स्विकारतले. सांगें मतदारसंघांत ही येवजण पांच कडेन चालीक लावपाची आशिल्ल्यान ताचे खातीर धा कोटी रुपया खर्च केल्ल्याचो आरोप जाता. हे येवजणेंत भ्रश्टाचार जावंक ना. गैरप्रकार जावपाक शकता. मात हे येवजणेंत व्हड घोटाळो जाला, हे वावडेचेर विस्वास दवरूं नाकात, असो उलो तांणी मारलो. आपणें आमदारकेचे उदरगत निधींतल्यान ४७ लाख रुपया सोबितीकरणाच्या कामाक दिल्यात. मैदानाची ३ कोटी खर्च करून उदरगत करतले. हे खातीर निविदा काडल्या.
सांग्यार ८.५ कोटी रुपया खर्च करून पुलीस स्टेशन इमारत बांदतले. ह्या वाठारांत जमीन उपलब्ध करून दियात. आपूण खाजगी उच्च माध्यमीक (हायर सेकंडरी) उबारतां. सांगेंच्या स्पोर्ट्स कॉम्प्लेक्सा कडेन स्विमिंग पूल बांदतले अशेंय तांणी सांगलें.
फळदेसाय हांणी वाडें सरकारी हायस्कुलान सेगीत सात वर्सां धावेचो १०० टक्के निकाल हाडिल्ले खातीर तोखणाय केली. शिक्षणीक उदरगतीचेर आपणें चड भर दिल्या. सांगेंच्या सगळ्या हायस्कुलांनी फळ्यांच्या जाग्यार स्मार्ट बोर्ड दिल्यात. गांवगिर्या वाठारांतल्या हायस्कुलांक शारी वाठारांतल्या विद्यार्थ्यांक सुविधा मेळटात त्यो मेळोवन दिवपा कडेन आपूण लक्ष दितां अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
