भांगरभूंय | प्रतिनिधी
प्रयागराज, खबरां संस्था ः बारा वर्सांत एक फावट जावपी महाकुंभ मेळाव्याची तयारी उत्तर प्रदेशांत नेटान सुरू आसा. महाकुंभ मेळाव्याच्या आवारांत वेवस्था आनी हेर गजालींची तजवीज करपा खातीर प्रशासन वेगवेगळ्या गजालींचेर काम करीत आसा. महाकुंभ मेळावो लागीं पाविल्ल्यान देशभरांतल्या भक्तांनी प्रयागराजाक वचपाची तयारी सुरू केल्या. तातूंत उत्तर प्रदेश सरकारान व्हडलो निर्णय घेतला. योगी सरकारान महाकुंभ मेळाव्या खातीर पुराय स्वतंत्र जिल्हो जाहीर केला.
फुडल्या म्हन्यात 13 जानेवारी सावन महाकुंभ मेळावो सुरू जातलो. हो मेळावो 26 फेब्रुवारी 2025 मेरेन चलतलो. प्रयागराजांत दर 12 वर्सांनी महाकुंभ मेळोवो घडोवन हाडटात. हांतूत देश-विदेशातल्यान व्हड प्रमाणात लाखांनी भक्त, भाविक आनी तपस्वी येतात.
नव्या जिल्ह्याचें नांव कितें आसतलें?
प्रयागराजांत जंय महाकुंभ मेळवो जाता तो पुराय वाठार जिल्हो जाहीर केला. त्या जिल्ह्याक ‘महाकुंभ मेळा’ अशें नांव दिलां. ह्या जिल्ह्याचे वेवस्थापन पुरायपणान स्वतंत्र करतले. महाकुंभ मेळवो घडोवन हाडून ताचे कडेन संबंदीत सगळ्यो गजाली योग्य रितीन पुराय करपा खातीर हो निर्णय घेतला अशें उत्तर प्रदेश सरकारान स्पश्ट केलां. हे संबंदीं प्रयागराजाचे जिल्होधिकारी रविंद्र कुमार मांदाद हांच्या नांवान परिपत्रक जारी केलां. 23 नोव्हेंबर 2024 दिसा अधिसुचोवणी काडिल्ली जातूंत ह्या वेगळ्या जिल्ह्याची नोंद केला.
प्रधानमंत्री मोदी नियाळ घेतले
मजगतीं, महाकुंभ मेळाव्याच्या वेवस्थापनाचो नियाळ घेवपा खातीर प्रधानमंत्री नरेंद्र मोदी स्वता 13 डिसेंबराक उत्तर प्रदेशाक भेट दितले. त्या वेळार महाकुंभ मेळाव्याचे वेवस्थापन आनी सुरक्षा तरतुदी संबंदीं म्हत्वाच्यो बसका आयोजीत केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
