भांगरभूंय | प्रतिनिधी
गिनी, खबरां संस्था: पश्चीम आफ्रिकेंतल्या गिनी देशांत फुटबॉल मॅची मजगतीं दंगल जाली. दोनूय संघाच्या समर्थकां मदीं व्हड झगडें पेटलें. हे दंगलींत १०० परस चड लोकांक मरण आयलां.
एन’झेरेकोर शारांत चलिल्ले फुटबॉल मॅची मजगतीं जाल्ल्या संघर्शांत बर्याच लोकांक मरण आयलें, अशें थळाव्या हॉस्पिटलांतल्या सुत्रांनी सांगलें.
एका दोतोरान सांगलें, हॉस्पिटलांत मरण आयिल्ल्या कुडींच्यो रांको आसात. हेर कुडी कॉरिडॉरांत जमनीचेर आसात.
सोशल मीडियाचेर व्हायरल जाल्ल्या व्हिडियोची एएफपी रोखडीच पडताळणी करूंक शकली ना. ह्या व्हिडियोंत स्टेडिमा भायर मारामारी आनी जमनीर पडिल्ल्यो जायत्यो कुडी दिसताल्यो.
साक्षीदारांच्या म्हणण्या प्रमाण, तिडकल्ल्या आंदोलकांनी एन’झेरेकोर पुलीस स्टेशनाची मोडतोड केली आनी उजो लायलो.
एका प्रत्यक्षदर्शनीन सांगलें, हें सगळें रेफरीच्या वादग्रस्त निर्णयान सुरू जालें. उपरांत समर्थकांनी आक्रमण करपाक सुरवात केली. मागीर दंगल सुरू जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
