भांगरभूंय | प्रतिनिधी
गोंयांत पर्यटकांची गर्दी वाडल्या तशे रस्ते लेगीत उणें पडपाक लागल्यात. विमानसेवा, रस्ते वाडूंक नाशिल्ल्यान ही गर्दी जाता. हाचेर उपाय म्हूण मोपा दुसरो विमानतळ सुरू जालो. आतां दाबोळेची गर्दी मात्शी उणीं जाली. एका विमानतळाचेर येवपी ताण कमी जालो. खेरीच हो विमानतळ दनपरां उपरांतूच विमानांक मेळटालो. मोपाक लागून ही समस्या आतां सोंपल्या. विमानांचो आंकडो वाडला, म्हणटकच चड पायलट जाय पडले, ते संबंदीचे चड कर्मचारी जाय पडले. अशे तरेन रोजगार वाडला. ह्या विमानतळाक लागून शेंकड्यांनी लोकांक प्रत्यक्ष, अप्रत्यक्ष रोजगार मेळ्ळा. पायलटांक बरो पगार मेळटा. ताका लागून आमच्या तरणाट्यांनी पायलट जावपाचो यत्न करपाक जाय. गोंयांत अजून ताचें शिक्षण, प्रशिक्षण दिवपाची सुविधा ना. मात तुमकां पुणेंच्या पायलट अकादेमींत वचपाक मेळटा.
पायलट अभ्यासक्रम शिकपाक तुमी विज्ञानाचे विद्यार्थी आसप गरजेचें. तुमकां नीट, नेट सारकी कठीण परीक्षा दिवपाची गरज ना, तरी फिजिक्स, गणिता सारके विशय घेवन पन्नास टक्के गुण बारावेक मेळपाक जाय. उपरांत तुमकां ते संस्थेच्या नेमा प्रमाण, वैजकी परीक्षा दिवची पडटा. हातूंत पास जाल्यारुच ते मुलाखत घेतात. हें प्रशिक्षण घेवपाक तुमकां चड फी दिवची पडटा. मात हे नोकरेंत बरो पगार, देश, विदेश भोंवपाची संद मेळटा. ह्या कोर्साक वचपाक सोदप्यांनी काॅलेज जांव उच्च माध्यमीक पांवड्यार एनसीसी घेवपाक विसरचें न्हय. हांगा जे प्रशिक्षण मेळटा, तें तुमकां पायलट जातना उपेगी पडटा. सर, तुमकां ताची गरज कित्याक तें सांगपाक शकतलो.
पायलट फांट्यांत तुमकां पांच प्रकार शिकपाक मेळटात, प्रवासी, खाजगी, प्रशिक्षक, हवाई दळ, खेळ… दरेका प्रकाराचें प्रशिक्षण वेगळे वेगळें आसूं शकता. खेरीज तुमकां परीक्षा आसता, ती वेगळीच. जर तुमकां पायलट अभ्यासक्रमाची चड म्हायती जाय जाल्यार 83906 54565 ह्या क्रमांकाचेर फोन करचो. तुमकां पुणेंच्या अकादमीची म्हायती मेळटली. ईमेलाचेरुय विचारपाक मेळटा. [email protected] वयर सांगलां तशें तुमकां ह्या प्रशिक्षणाक फी चड आसता, तरी तुमकां प्रशिक्षण पूर्ण केल्या उपरांत नोकरी मेळप कठीण वचना. एका वर्साच्या काळांत हें प्रशिक्षण पुराय जाता.
1908 वर्सा फ्रान्सांत लुई ब्लेरियट हाका पयलो पायलट जावपाचें प्रमाणपत्र दिल्लें. ही नोकरी जापसालदारकेची. देखून उमेदवाराची निवडूय कडक चाचण्यो घेवन जाता. गोंयांत हे सेवेक खूब मागणी आसा. पर्यटन सोडाच, पूण वैजकी सेवा घेवपाक लोक मुंबय, पुण्यां वा हेर कडेन वतात, तांकां हेलिकाॅप्टर अॅम्ब्युलन्स सेवा तुमी सुरू करपाक शकतात. तुमी तांकां वा पर्यटकांक सेवा दिवंक शकतात. 2017 मेरेन संवसारांत 2 लाख 90 हजार पायलट आशिल्ले. हातूंत भर पडत आसा. नव्यान पायलटांची गरज पडटली. सध्या कांय वेवसायीक पायलट स लाखां वयर पगार घेतात, तर हेलिकाॅप्टर पायलटाक साठ हजारां वयर पगार आसा. तुमकां हाची म्हायती निवृत्त कॅप्टन प्रदीप राठोड दिवंक शकतात. कांय कंपनी हाचे परस चड पगार, सवलती दितात. पूण हें काम खूब जापसालदारकेचें. ह्या अकादेमींत शिकिल्ले बरेच विद्यार्थी पायलट म्हूण यशस्वी जाल्यात, देखीक अनुराग हुंदळकर, पार्थवी पटेल, शुभम माने आनी हेर. तेन्ना विद्यार्थ्यांनी ह्या वेगळ्या फांट्योच जरुर विचार करचो.
ई बुक्स
आयज जायत्या जाणांक पुस्तक छापप शक्य नासता. तें खपयतनाय त्रास जातात. ते ई-बुक्स छापपाक सोदतात. तुमकां जर ई बुक्साची आवड आसा जाल्यार तुमी उल्का पासलकार हांचे कडेन 70281 70150 ह्या क्रमांकाचेर संपर्क करचो. ही संस्था कार्यशाळाय आयोजीत करता.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
