भांगरभूंय | प्रतिनिधी
ही गजाल बापायल्या रोखडीच लक्षांत आयली. ताणें राजूक समजावपाचें हेतान कांय गजाली सांगपाचें थारायलें. ताणें म्हणलें
सामंत आडनांवाचें मध्यमवर्गीय कुटुंबांतलो राजू नांवाचो एक भुरगो धावेचे परिक्षेंत 90% गूण मेळोवन पास
जाल्लो. ताचो बापूय सुभाष खोशयेन राजूलें मार्कशीट पळोवन रांदचें कुडीत व्यस्त आशिल्ले तागेली बायलेक, सविताक सांगता, अं हय गो आयकता … आयज जेवणात राजूक आवडटा तसलो कितें तरी रुचीक जिन्नस कर आं, आमगेल्या राजून धावेचे परिक्षेंत 90% गूण मेळयल्यात…! हें कानार पडटकूच सविता हातचें काम सोडून रांदचे कुडींतल्यान उमेदीन धांवत भायर येयत घोवाक म्हणटा. ” दाखयात ..पळोवया राजून शिक्षणांत केल्ली उदरत”.
मदींच राजू उलयलो… ” पप्पा आयकतात तुमी? मम्मा तुमचे लागीं रिजल्ट पळोवंक कार्ड मागता. तिका वाचपाक बरोवंक कळटा हय?… मम्मा सामकी अडाणी अक्षरशत्रू मगा “. अशें म्हणत राजू मोठ-मोठ्यान हांसलो. पुताले असलें उलवणें आयकूंन आवयक रडूंक आयलें. थंयसून दुकांनी भरिल्ले दोळे पदरान पुसत रांदचे कुडींत गेली.
ही गजाल बापायल्या रोखडीच लक्षांत आयली. ताणें राजूक समजावपाचें हेतान कांय गजाली सांगपाचें थारायलें. ताणें म्हणलें, “हय! तेंय खरेंच, हांव सविता वांगडा आमी लग्न जातकूच सविताक तीन म्हयन्यां भितर गुरवाचार आयलो. तेन्ना हांवें येवजिल्लें लग्न जाले उपरांत व्यक्तीगत म्हायतीची देवाण -घेवाण करुंक एकमेकांक समजून घेवपा खातीर भायर भोंवपाक, रावपाक गेली नाशिल्लीं. ताका लागूनुच हे खेपे गर्भपात करून फुडली संद घेवया. म्हजें मत हांवे तुगेल्या आवय मुखार मांडलें तेन्ना सवितान म्हाका कितें सांगलें जाणा राजू….?
मम्मान सरळ म्हणलें “ना”.. फुडें नाका, आतां जें भुरगें म्हजें उदरांत जल्म घेता ताचे खातीर म्हाका आनीक भायर फिरपाची इत्सा ना, संवसार करतां करतां एकामेकांक समजूंक शकतात न्हय? मागीर गर्भपात किद्याक? असो तिणें म्हाकाच उरफाटो प्रस्न केलो आनी फुडें स म्हयन्या उपरांत तूं जल्माक आयलो, तेन्ना ती अडाणीपणान वागिल्ली दिसता तुका”? अशें बाप्पायन पुताक विचारलें आनी सांगले तूं सवितालें पोटांत खेळटना सविताक दूद बिल्कुल आवडनाशिल्लें, पूण गुरवाचार काळांत तुका निरोगी दवरुंक ती णव म्हयने दर दिसा दूद पियेताली… तेन्ना ती अडाणी आशिल्ली काय”…? तूं सकाळीं सात वरांचेर शाळेंत वतालो देखून तुजी मम्मा फांतोडेचे पांच वरांचेर उठून तुजें खातीर तुजो आवडीचो नाश्तो आनी टिफिन तयार करुन दिताली तेन्ना सूद मम्मा अडाणीच आशिल्ली व्हय,? रातच्या वेळार तूं शिकतना तुजो मदींच दोळो लागतालो तेन्ना येवन हातूणां वयलीं पुस्तकां, नोटबुक वेवस्थित सुवातेर दवरुंन तुजें चादर, पांघरुण सारकें केल्या उपरांतूच तुजी अडाणी आवय न्हिदताली, भुरगेपणांत तूं चडसो दुयेंत पडटालो मागीर तुगेली अडाणी मम्मा तुजे उश्या कडेन बसून रात -रात जागयताली, फांतोडेर सक्काळीं परतून तिगेल्या कामांक लागताली, तूं म्हजे कडेन ब्रँडेड कपडे मागतालो तेन्ना आवय कडसून कसलीच अपेक्षा नासतालीं. तुगेली अडाणी आवय मात वर्सान वर्सा पोरणी वायलां, साडयो न्हेसताली. बाब… बऱ्या शिकिल्ल्या लोकां मदीं सुस्वार्थ आनी नीचपणा आसता.. पूण आतां मेरेन तुजे अडाणी आवय भितर म्हाका कसलेच तरेचो वायट सभाव केन्नाच नदरेक दिसूंक ना “. तूं नकळो आसत ती आमकां लागून जेवण रांदता, वाडटा आनी केन्ना केन्ना अडाणी आवय स्वता जेवपाक विसरता”.
बापायन राजूक सांगिल्लें आवयन वेळार घेतिल्ले योग्य निर्णय, कश्ट हें सगळें आयकून ओदोल हांसपी राजू रडपाक लागलो. सविताक घट्ट वेंग मारीत ताणें आवयक अडाणी म्हणपाचे चुकी खातीर तिची माफी मागली. म्हणपाक लागलो, “मम्मा , हांवे पेपरांत फकत 90% गूण मेळयल्यात . पूण म्हजें जिवीत शंबर टक्के करपी पयली खरी शिक्षक तूं. आनी ज्या शिक्षकाच्या भुरग्यांक 90% गूण मेळटात त्या शिक्षकांक कितलें गिन्यान आसतलें? असो हांवें केन्नाच विचार करूंक ना. मम्मा आयज म्हाका 90% गूण मेळ्ळे, पूण हांव शिक्षण घेतिल्लों अशिक्षीत आनी तुका शिक्षणा विणें पीएचडी परस वयली पदवी आसा. कारण मम्मा आयज पप्पान सांगलां ते प्रमाण म्हाका तूजे भितर दोतोर, शिक्षक, वकील, म्हजे कपडे शिंवपी ड्रेस डिझायनर, बेस्ट कुक दिसलो. जें किदें हांव उलयलों ते खातीर माफ करात म्हाका.
दरेक चलो वा चली केन्नाय आवय बाप्पाचें उलोवण्यार बेजारतात. तांगेलो अपमान करतात. कारणा विणें रागार जातात. आवयन -बापायन भुरगीं येसाचें तेंगशेर पावपा मेरेन घेतिल्ले त्रास विसरतात. प्रत्येकान आवय- बापायच्या मनाचो विचार करचो.
——————————
सुदिन वि. कुर्डीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
