धारगळे सनबर्न जावचे आदींच भगभगता

भांगरभूंय | प्रतिनिधी

आमदार प्रवीण आर्लेकार बंडाच्या मुडांतः विस्वासांत घेवंक नाशिल्ल्यान सरकाराचेर शीण

भांगरभूंय । प्रतिनिधी

पेडणेः पेडणें मतदारसंघाचे आमदार प्रवीण आर्लेकार हे सत्तेंत आसून लेगीत तांकां विस्वासांत घेवन नियोजीत सनबर्न महोत्सवाच्या आयोजनां विशीं मातूय कल्पना दिवंक ना. ताका लागून फक्त धारगळेच न्हय जाल्यार पुराय पेडणें म्हालांत आमकां सनबर्न नाका, अशी पेडणेंच्या कांय लोकांनी भुमिका घेतल्या. जाल्यार आपल्याक विस्वासात घे नासतना धारगळे सनबर्न आयोजीत करपाचो यत्न चल्ला. दर खेपे आपल्याक विस्वासांत घेना. ते खातीर लोकां वांगडा आपूण रस्त्याचेर देंवत आसता. धारगळे सनबर्न जावचो ना, म्हणल्यार जावचो ना. सोमारा 2 डिसेंबराक जावपी पंचायत बसकेंत जर पंचायत मंडळान सनबर्न महोत्सवाक परवानगी दिली जाल्यार आपूण भितर घुसून कितें तें दाखयतलों, अशी शिटकावणी पेडणेंचे आमदार प्रवीण आर्लेकार हांणी आयतारा सनबर्नाच्या विरोधांत पंचायत कार्यालया भायर आयोजीत केल्ले जाहीर सभेंत दिली. ह्या वेळार व्हड संख्येन लोक हाजीर आशिल्ले.

दुसरे वटेन सनबर्नाक तेंको दिवचे खातीर पंचायत मंडळाचो सत्तेर आशिल्लो गट आनी लोक तशेंच टॅक्सी वेवसायिकांची सनबर्न महोत्सवाक तेंको दिवचे खातीर धारगळच्या कामाश्री सभाघरांत एक जाहीर सभा जाली. ताका लागून धारगळे सनबर्न सुरू जावचे आदींच सनबर्न पेटोवपाचो प्रकार घडला. सनबर्न विशया वयल्यान सध्या दोन गट जाल्यात. ते दोन गट परतून एकठांय येवपाची शक्यताय धुसर जाल्या. पेडणें मतदारसंघाचे आमदार प्रवीण आर्लेकार हांणी स्वता फुडाकार घेवन मतदारसंघांतले सरपंच, उपसरपंच, पंच, भाजप कार्यकर्ते, लोक हांकां आमंत्रीत करून जाहीर सभा घेतली. तातूंत मिशन फॉर लोकलचे राजन कोरगांवकार, मांद्रेंचे आदले सरपंच अ‍ॅ. आमीत सावंत, आदले सरपंच बाळा उर्फ प्रशांत नायक, मतदारसंघांतले साबार पंच, उपसरपंच, लोक व्हड संख्येन हाजीर आशिल्ले.

सनबर्न महोत्सव आमकां धारगळे नाकाच आनी आमी तो जावपाक दिवचे नात. ती आमची संस्कृती न्हय. पेडणेंकारांक कितें जाय तें दिवपाची आमची तयारी आसा. ते खातीर सरकारान लेगीत परतून विचार करचो आनी अश्या महोत्सवांक परवानगी दिवची न्हय, अशी नेटाची मागणी ह्या वेळार आर्लेकार हांणी केली.

लोकांक नाका जाल्यार सनबर्न जायच कित्याक? लोकांक नाका जाल्यार पेडणें म्हालांत तो खंयच जावपाक दिवचों ना. आपल्याक विस्वासांत घे नासतना सरकारान हो निर्णय घेतलोच कसो? आपल्याक विचारिल्लें जाल्यार आपूण सुरवातीच्यानूच हाका विरोध करपाचों. धारगळ पंचायत मंडळान पेडणेंच्या लोकांचे भावनेचो विचार करून सनबर्न महोत्सवाक परवानगी दिवची न्हय, अशें आर्लेकार हांणी सांगलें.

हे सभेंत अ‍ॅड. अमीत सावंत, रामा काणकोणकार, रामा वारंग, प्रशांत नायक, शंकर पोळजी, भास्कर नारुलकार, अ‍ॅड. जितेंद्र गांवकार, गौरी जोसलकार, अनिकेत साळगांवकार, देवेंद्र देसाय, भूषण नायक, राजन कोरगांवकार, तुकाराम हरमलकार, रमेश सावळ, कृष्णा नायक, अशोक धावस्कार, अ‍ॅड. प्रसाद शहापूरकार, बबन नायक, पुंडलीक धारगळकार, भारत बागकार, छाया शेट्ये, अश्वेक नायक, सुरेश कारापूरकार, प्रितेश कानोळकार, आवेलीन रॉड्रिगीस, रोहिदास हरमलकार, उदय मांद्रेंकार हांणी आपले विचार मांडले. ह्या वेळार मोपाचे सरपंच सुबोध महाले, तोरशेचे उपसरपंच रमेश बुटे, आदले सरपंच उत्तम वीर, वीजय तोरसेकार, विजय मोपकार, काशीनाथ पेडणेंकार हे समाज वावुरपी हाजीर आशिल्ले.

धारगळे जावपा आशिल्ल्या नियोजीत सनबर्न महोत्सवाक विरोध करचे खातीर पेडण्याचे हजारांनी लोक पंचायत कार्यालया मुखार एकठांय जाल्ले. बंदोबस्ता खातीर पुलीस लेगीत व्हड प्रमाणांत तैनात केल्ले. मोपा पुलीस स्टेशनाचे निरिक्षक नारायण चिमुलकार, पेडणेंचे पुलीस निरिक्षक सचीन लोकरे हांचे सयत उपअधिक्षक आशिष शिरोडकार उपस्थीत आशिल्ले.

सनबर्न पेडणेंच्या फुडाराचें घट्टण करतलो. तरणाट्यांचो फुडार काळखी जातलो. ह्या महोत्सवांत सोरो, घुंवळी वखदांचो मेकळेपणान वापर जाता. ताका लागून युवा पिळगी बरबाद जातली. हे बाबतींत हेर वाठारां परस पेडणें म्हाल खुबूच फाटीं आसा. संस्कृती नानपय करपी हो सनबर्न महोत्सव तत्काळ रद्द करचो, अशी मागणी पेडणेंचे सभेंत साबार मानेस्तांनी केली. हो सनबर्न दुसरे कडेन वचना ते मेरेन लढो चालूच दवरचो. लोक जें मागतात तें दिवपाक सरकार उणें पडटा. आमी मागिनासतना पेडण्यांत कसिनो, सनबर्न, ईडीएम सरकार आमकां कित्याक दिता? पेडण्यांत सुसंस्कृत लोक रावतात, हो म्हाल संस्कृती सांबाळटा, अशेंय तांणी सांगलें. हे सभेक धारगळचे आदले सरपंच तशेंच सध्याचे पंच भूषण उर्फ प्रदीप नायक, अनिकेत साळगांवकार सोडून सत्तेर आशिल्ल्या गटांतलो एकूय पंच वांगडी हाजीर रावूंक नाशिल्ल्यान लोकांनी नाराजी उक्तायली. 2 डिसेंबराक धारगळ पंचायतीची विशेश बसका जातली आनी तातूंत सनबर्न महोत्सवाक परवानगी दिवपाचो निर्णय घेतले. ह्या निर्णया कडेन लोकांची नदर आसा. तशेंच आमदार आर्लेकार हांणी दिल्ली शिटकावणी आनी शिटकावणीची दखल पंचायत मंडळ कशी घेता हाचेरूय लोकांचें लक्ष आसा.

धारगळ पंचायतीचो सनबर्नाक तेंको

पेडणेः धारगळे जावपी सनबर्न महोत्सवाक आयतारा धारगळ पंचायतीचे चडशें पंच, सरपंच आनी लोकांनी तेंको दिलो. आयतारा धारगळ पंचायत कार्यालया मुखार आनी त्याच धारगळ वाठारांत सनबर्न महोत्सवा संबंदांत दोन सभा जाल्यो.

सरपंच सतीश धुमाळ हांणी सांगलें, जर लोकांक सनबर्न जाय आनी गांवचें बरें जाता तशेंच थंय कसलोच गैरप्रकार जावचो ना जाल्यार आमी समबर्न महोत्सवाक तेंको दितात. ह्या वेळार उलोवप्यांनी सांगलें, आयज पंचयत कार्यालया मुखार आनीक एटक सनबर्नाक विरोध करचे खातीर सभा घेता. तातूंत कांय जाण उलोवपी सोडल्यार चडशे लोक दुसऱ्या गांवांतल्यान आयल्यात. हे आदीं आमी खूबश्या प्रकल्पांक विरोध केल्लो, तेन्ना ते कित्याक आयले नात? आयज राजकी फुडारी आपल्या सुवार्था खातीर लोकांक एकठांय करून विरोध करतात. ते सभेक धारगळचो एकलोय ना. संस्कृतीच्या नांवान राजकी मनीस आपलें सादोवपाक सोदता. धारगले कॅसिनो आयलो, जिवाक घातक असो सिमेंट प्रकल्रप आयलो, ताका आमदार प्रवीण आर्लेकार हांणी विरोध कित्याक करूंक ना?