भांगरभूंय | प्रतिनिधी
पणजी :वेर्णा पुलिसांनी म्हाड्डोळ-वेर्णेंच्या उक्त्या मैदानार छापो घालून गांजो बाळगिल्ले खातीर रोहन बिंद (२६, मिर्झापूर – उत्तरप्रदेश) ह्या तरणाट्याक अटक केल्ली. ताचे कडल्यान ४.२५ लाख रुपयांचो ४.२५ किलो गांजो जप्त केला.
मजगतीं, हे विशीं वेर्णा पुलिसांनी दिल्ले म्हायती प्रमाण, म्हाड्डोळ – वेर्णाच्या उक्त्या मैदाना लागसारा एक तरणाटो गांज्याचे तस्करी खातीर येतलो अशी म्हायती मेळ्ळी. ते प्रमाण पुलीस उपनिरीक्षक निखिल नायक देसाय, हवालदार अजीत शिरोडकार, कॉंन्स्टेबल सतीश लकाडे, जगदेव दोत्रेकर, श्रीनिवास रेड्डी आनी हेर पुलिसांच्या पंगडान शेनवारा सांजेवेळार ४. ४५ ते ६.४५ मजगतीं संबंदीत सुवातेर सांपळो रचलो.
हाचे मजगतीं एक तरणाटो थंय आयलो. उपरांत ताची चवकशी केली. तेन्ना पंगडान रोहन बिंद (२६, मिर्झापूर – उत्तरप्रदेश) हाका ताब्यांत घेवन ताचे कडल्यान गांजो जप्त केलो. हे विशीं उपनिरीक्षक रामचंद्र नायक हांणी रोहन बिंद हाचे आड घुवळे वखदां विरोधी कायद्या खाला गुन्यांव दाखल करून अटक केली. अटक केल्ल्या दुबाविताक न्यायालयान पांच दीस पुलीस बंदखण दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
