गोंयच्या केंद्रीय निधींत दुपेटीन वाड

भांगरभूंय | प्रतिनिधी

तीन वर्सांत 2 हजार कोटी वयल्यान 4 हजार कोटी

भांगरभूंय । समीप नार्वेकार

पणजीः फाटल्या तीन वर्सांत गोंयाक केंद्रांतल्यान मेळपी निधींत दर वर्सा सेगीत 1 हजार कोटींची वाड जाल्या. गोंयाक 6 माध्यमांतल्यान केंद्राचो निधी मेळटा. 2021-22 त ह्या 6 माध्यमांतल्यान गोंयाक 2 हजार कोटी मेळिल्ले, आतां 2023-24 त हो आंकडो 4 हजार कोटी मेरेन पावला. फाटल्या तीन वर्सांत गोंयाक वट्ट 11,106 कोटी रुपया इतलो निधी केंद्रांतल्यान मेळ्ळा, अशी म्हायती केंद्रीय वित्त मंत्रालयान दिल्या.

वित्त मंत्रालयान जारी केल्ले म्हायती प्रमाण गोंय राज्याक वित्त आयोग, केंद्र पुरस्कृत येवजण्यो, केंद्राच्यो स्वतंत्र येवजण्यो, अनुदानीत प्रकल्पां खातीर मजत, विशेश मजत, कॅपिटल निवेश तशेंच खर्चा खातीर गोंयाक विशेश मजत येवजणे खाला 2021-22 त 2,478 कोटी, 2022-23 त 3,885 कोटी आनी 2023-24 त 4,740 इतलो निधी मेळ्ळा. फकत वित्त आयोगांतल्यान मेळपी निधींत मात उणाव जाला. जाल्यार भायल्या अनुदानीत प्रकल्पा खातीर कसलोच अर्थीक निधी आतां मेरेन गोंयाक मेळूंक ना.

फाटल्या तीन वर्सात वित्त आयोगा कडल्यान गोंयाक 184 कोटी मेळ्ळ्यांत. तातूंतले 2021-22 त 119 कोटी आयले. उपरांत 2022-23 त हो आंकडो देंवून 54.20 कोटी मेरेन पावलो आनी 2023-24 त हो आंकडो सामकोच उणो जावन 10.80 कोटी मेरेन पावलो.

केंद्रीय पुरस्कृत येवजणे खाला गोंयाक 896 कोटी

गोंय राज्याक केंद्रीय पुरस्कृत येवजणे खाला 896 कोटी रुपया आयल्यात. तातूंतले 2021-22 त 173 कोटी, 2022-23 त 341 कोटी आनी 2023-24 त 381 कोटी आयले. जाल्यार केंद्राच्या स्वतंत्र येवजणे खाला गोंयाक 8,298 कोटी रुपया फावो जाल्यात. तातूंतले 2021-22 त 1,925 कोटी, 2022-23 त 2,918 कोटी आनी 2023-24 त 3,454 कोटी रुपया आयल्यात.

केंद्रांतल्यान विशेश मजती खाला 350 कोटींचो निधी

गोंयाक केंद्रातल्यान विशेश मजती खाला 350 कोटी निधी मेळ्ळा. तातूंतले 2021-22 त 150 कोटी, 2022-23 त शून्य आनी 2023-24 त 200 कोटी रुपया आयले. कॅपिटल निवेश तशेंच खर्चा खातीर राज्याक विशेश मजत येवजणे खाला गोंयाक 1,378 कोटी रुपया मेळ्ळ्यांत. तातूंतले 2021-22 त 111 कोटी, 2022-23 त 572 कोटी आनी 2023-24 त 695 कोटी रुपया मेळ्ळे.