भांगरभूंय | प्रतिनिधी
-एसबीआय बँकेच्या आदल्या वेवस्थापका आड गुन्यांवपणजीः भारतीय स्टेट बँकेच्या पणजेंतल्या ट्रेझरी फांट्याचे आदले वेवस्थापक राकेश कुमार हांचे आड गुन्यांव फांट्यान उत्तर गोंय जिल्हो आनी सत्र न्यायालयांत आरोपपत्र दाखल केला. कुमारा हांचेर आपल्या पदाचो गैरवापर करून 2.23 कोटी रुपयांची अफरातफर केल्ल्याचो आरोप आसा.
भारतीय स्टेट बँकेचे उत्तर गोंयचे प्रादेशीक वेवस्थापक ज्ञानेश्वर ठाकरे हांणी ह्या प्रकरणांत 23 एप्रील 2022 दिसा गुन्यांव फांट्यांत कागाळ दाखल केल्ली. मेळिल्ले म्हायती प्रमाण, आदले वेवस्थापक राकेश कुमार हांची पणजी एसबीआय बँकेच्या ट्रेझरी फांट्यांत 8 मार्च 2018 ते 6 जून 2021 मेरेन वेवस्थापक म्हणून नेमणूक जाली. ह्या फांट्यांत सरकाराच्या वेगवेगळ्या खात्यांतल्यान कर आनी हेर रक्कम एकठांय करतात. ह्या तीन खात्यांतल्यान म्हळ्यार डेबीट खातें क्रमांक 30126495838, क्रेडीट खातें क्रमांक 98556088510 आनी क्रेडीट खातें क्रमांक 98784088510 (3 नोव्हेंबर 2022 ते 8 एप्रील 2021) ह्या काळांत सुमार 1,89,20,746 रुपया राकेश कुमारान आपल्या खात्यांत जमा केल्ले. हातूंत मुंबयंतल्या आयआयएफएल सिक्युरिटी लिमिटेड कंपनीच्या खात्याचो उल्लेख कागाळींत केला.
जून 2021 वर्सा राकेश कुमार हांची गोंयांतल्यान दुसरे सुवातेर बदली जाले उपरांत ही घडणूक उजवाडाक आयली. त्या वेळार ताचे सुवातेर आयिल्ल्या वेवस्थापकाक वयल्या खात्यांत कितें तरी चुकीचें नोंद जालां असो दुबाव आयलो. ते उपरांत बँकेन मुळावी चवकशी केली आनी उपरांत गुन्यांव फांट्यांत कागाळ दाखल केली.
ह्या प्रकरणांत गुन्यांव फांट्याचे तेन्नाचे पुलीस निरिक्षक सतीश गावडे हांणी दुबावीत राकेश कुमार हांचे आड गुन्यांव नोंद करून चवकशी सुरू केली.
मजगतीं, दुबावीत राकेश कुमारान बँकेची 2 कोटी 23 लाख 32 हजार 055 रुपयांची फटवणूक केल्ल्याची म्हायती मेळ्ळी. ह्या प्रकरणांतली चवकशी पुराय केले उपरांत निरिक्षक निनाद देऊलकार हांणी गुन्यांव फांट्याचे अधीक्षक राहुल गुप्ता आनी उपअधीक्षक राजेश कुमार हांच्या मार्गदर्शना खाला दुबावीत राकेश कुमार हांचे आड पणजेच्या उत्तर गोंय जिल्लो आनी सत्र न्यायालयांत आरोपपत्र दाखल केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
