भांगरभूंय | प्रतिनिधी
-मजतनिसांच्या मानधनांत केरळा उपरांत गोंयचो क्रमांकपणजीः आंगणवाडी सेविकांक मानधन दिवपांत देशांत गोंयचो क्रमांक पयले सुवातेर आसा. मजतनिसांक मानधन दिवपांत केरळ राज्य फुडें, गोंय दुसरें. गोंयांतल्या आंगणवाडी सेविकांक मेळटा तितले मानधन हेर खंयच्याच राज्यांत मेळना अशें बायलां आनी कल्याण मंत्रालयाच्या अहवालांतल्यान स्पश्ट जालां.
देशांतल्या 36 राज्यांनी आपापल्या राज्यांत काम करपी आंगणवाडी सेविकांक आनी मजतनिसांक कितले मानधन मेळटा हाची वळेरी मंत्रालयान जाहीर केल्या. ते प्रमाण गोंयांत 25 वर्सां आनी ताचे वयर अणभव आशिल्ल्या सेविकांक सरकारा कडल्यान म्हयन्याक 12 हजार रुपया मानधन मेळटा. 10 वर्सां मेरेनचो अणभव आशिल्ल्या सेविकांक 5,500 रुपया, 10 ते 15 वर्सांचो अणभव आशिल्ल्यांक 6 हजार, 15 ते 20 वर्सांचो अणभव आशिल्ल्यांक 8 हजार आनी 20 ते 25 वर्सांचो अणभव आशिल्ल्या सेविकांक म्हयन्याक 10 हजार रुपया मानधन मेळटा. मध्य प्रदेश आनी केरळ हीं दोन राज्यां हे वळेरेंत आसात. 10 वर्सांचो अणभव आशिल्ल्या सेविकांक 8,500 रुपया मानधन मेळटा अशें आंकडेवारींतल्यान स्पश्ट जालां.
मजतनिसांच्या मानधनांत केरळाचो पयलो आनी गोंयचो दुसरो क्रमांक. केरळांत 5 वर्सांचो अणभव आशिल्ल्या मजतनिसांक 6,250 आनी 10 वर्सां वा चड वर्सांचो अणभव आशिल्ल्या मजतनिसांक 6,750. म्हणल्यार गोंयांत 25 वर्सां वा ताचे परस चड काळ सेवा दिल्ल्या मजतनिसांक 6 हजार रुपया दितात. 5 वर्सां मेरेनचो अणभव आशिल्ल्या मजतनिसांक 3,000, 5 ते 10 वर्सांचो अणभव आशिल्ल्या मजतनिसांक 3,500, 10 ते 15 वर्सांचो अणभव आशिल्ल्या मजतनिसांक 4,000 आनी 15 ते 20 वर्सांचो अणभव आशिल्ल्या मजतनिसांक 4,500 आनी 20 वर्सांचो अणभव आशिल्ल्या मजतनिसांक 5,000 रुपया मानधन मेळटा अशें अहवालांतल्यान दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
