भांगरभूंय | प्रतिनिधी
सूरत, खबरां संस्था ः ‘डिजिटल अरेस्ट’ ही फटवणूक करपाची पद्दत फाटल्या कांय दिसां सावन बरीच चर्चेत आसा. गुजरातांतल्या एका 90 वर्सां पिरायेच्या जाण्ट्या मनशाक ताणें जिवीतभर कश्ट करून एकठांय केल्ले एक कोटी रुपया ‘डिजिटल अरेस्ट’ पद्दती वरवीं लुटिल्ल्याची धक्को दिवपी घडणूक उजवाडाक आयल्या. फटोवप्यान आपूण सीबीआय अधिकारी आशिल्ल्याचें सांगिल्लें.
गुजरात गुन्यांव फांट्यान दिल्ले म्हायती प्रमाण चीनी टोळयेच्या मजतीन चलपी रॅकेट उक्ताडार करुन ह्या प्रकरणांत 5 जाणांक अटक केल्या. ह्या प्रकरणांतलो मुखेल आरोपी पार्थ गोपानी हो कंबोडियांत आशिल्ल्याचो दुबाव आसा. ह्या प्रकरणाचो गुन्यांव फांटो पुराय तपास करता.
पुलीस उपायुक्त भावेश रोजिया हांणी सांगलें, शेअर बाजारांत गुंतवणूक करपी ज्येश्ठ नागरिकाक व्हॉट्सअॅपाचेर आरोपीचो फोन आयिल्लो. ताणें आपूण सीबीआयचो अधिकारी असो दावो केलो. तशेंच तुमच्या नांवान मुंबय सावन चीनाक धाडिल्ल्या कुरियरांत 400 ग्राम एमडी ड्रग्स मेळ्ळ्यांत अशेंय ज्येश्ठ नागरीकाक सांगलें. तशेंच बँक खात्याच्या तपशीलां प्रमाण तुमचो मनी लॉन्ड्रिंगांत आस्पाव आसा असोय दावो फटोवप्यान जाण्ट्या मनशा कडेन केलो. आनी ह्या प्रकरणांत गिन्यांव नोंद करून तुमकां आनी तुमच्या कुटुंबाक अटक करतले असोय भंय ताका घालो. चवकशीच्या निमतान आरोपीन त्या जाण्ट्या मनशाक 15 दीस ‘डिजिटल अरेस्ट’ खाला दवरलो आनी ताच्या बँक खात्यांतल्यान केल्ल्या वेव्हारा विशीं ताका प्रस्न विचारलें. ते उपरांत आरोपींनी त्या जाण्ट्या मनशाच्या बँक खात्यांतल्यान 1,15,00,000 रुपया हस्तांतरीत केले.
फटवणूक जाल्ल्याचे कळटाच त्या जाण्ट्या मनशाच्या कुटुंबान सूरत सायबर सेला कडेन संपर्क केलो आनी पुराय म्हायती दिली. उपरांत चवकशी करुन ह्या प्रकरणात 5 जाणांक अटक केल्या. जाल्यार मुखेल आरोपीचो सोद सुरु आसा. अटक केल्ल्या आरोपीं कडल्यान वेगवेगळ्या बँकांचे 46 डेबिट कार्ड, 23 बँक चेक बुक, एक गाडी, वेगवेगळ्या कंपनींचे चार रबर स्टॅम्प, 9 मोबायल फोन आनी 28 सिम कार्डा जप्त केल्यात अशें पुलिसांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
