भांगरभूंय | प्रतिनिधी
नवी दिल्ली, खबरां संस्था ः राजस्थान, मध्य प्रदेश आनी उत्तर प्रदेश हांकां जोडून देशांतलो सगळ्यांत व्हडलो चीता कॉरिडोर तयार जातलो. हे संबंदी फुडल्या म्हयन्यांत राजस्थान आनी मध्य प्रदेश सरकारां मदीं समजिकाय कबलात जातली. हे संबंदीं शुक्रारा सवाई माधोपूरांत राजस्थान आनी मध्य प्रदेशांतल्या मुखेल वन्यजीव रक्षकांची बसका जाली.
1500 ते 2000 किलोमिटरांचो हो कॉरिडॉर तीन राज्यांच्या 22 जिल्ह्यांक जोडटलो. ह्या चीता कॉरिडॉराचो मध्य प्रदेशांतल्या कुनो सावन शिवपुरींतल्यान मंदसौरांतल्या गांधीसागर अभयारण्या वयल्यान राजस्थानांतल्या मुकुंदरा वाग राखीव वाठारा मेरेन विस्तार जातलो. राष्ट्रीय वाग संवर्धन प्राधिकरणान प्रस्तावीत केल्ल्या प्रकल्पाच्या वावरांतल्यान ही म्हायती उजवाडाक आयलां.
राजस्थानाच्या 10 जिल्ह्यांचो कॉरिडोरांत आस्पाव केला. मध्य प्रदेशांतलें गांधीसागर अभयारण्य बिबट्यां खातीर तयार आसा. मेळिल्ले म्हायती प्रमाण अंदूंच्या वर्साच्या निमाणे मेरेन बिबटे गांधीसागर अभयारण्यांत पावतले. सध्या हांगा 8 बिबटे दवरल्यात.
चिता कॉरिडोर प्रकल्पा वरवीं राजस्थानांतल्या 10 जिल्ह्यांच्यो शीमा (धोलपूर, करौली, सवाई-माधोपूर, बरन, झालावाड, कोटा, भीलवाडा, चित्तोडगड, प्रतापगढ, बांसवाडा) मध्य प्रदेशांतल्या 10 जिल्ह्यांक जोडटले. (झाबुआ, रातम) मंदसौर, निमच, अगरमालवा, राजगढ, गुना, शिवपुरी, श्योपूर, मोरेना हांचे शीमेर आसा. भोंवतणचे 5 जिल्हे आसात, जंय रानवटी जनावरांची हालचाल शक्य आसा. हाचे वांगडाच उत्तर प्रदेशांतले झांसी आनी ललितपूर ह्या दोन जिल्ह्यांचो ह्या कॉरिडोर प्रकल्पांत आस्पाव केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
