भांगरभूंय | प्रतिनिधी
पणजीः फाटल्या धा वर्सांत गोंयांतल्या 4.90 लाख जाणांनी प्रधानमंत्री मुद्रा रीण येवजणेचो लाव घेतला. वित्तीय वर्स 2015-16 ते 2024-25 (1 नोव्हेंबर मेरेन) गोंयांतल्या लाबार्थ्यांक 4,920 कोटी रुपयांचें रीण मंजूर केल्या. केंद्रीय अर्थमंत्री निर्मला सीतारामन हांणी ही म्हायती दिल्या.
लेखी जापेंत दिल्ले म्हायती प्रमाण, फाटल्या धा वर्सांत वट्ट लाबार्थ्यां मदी 36 टक्के म्हळ्यार 1.72 लाख बायलां आसात. ह्या काळांत बायलांक 1,263 कोटी रुपयांचें रीण मंजूर केला. वयल्या काळांत 2022-23 वर्सा चडांत चड 24 हजार 131 बायलांक 203 कोटी रुपयांचें रीण मंजूर केल्लें. वयल्या काळांत सगळ्यांत उणें रीण 2015-16 वित्तीय वर्सा म्हळ्यार 86.37 कोटी रुपया जालें. अंदूं 16 हजार 327 बायलांनी हाचो लाव घेतलो.
राज्यांतल्या अनुसूचीत जाती, अनुसूचीत जनजाती आनी ओबीसी समुदायांतल्या व्यक्तींकय हे येवजणेचो फायदो जाला.
जापेंत दिल्ले म्हायती प्रमाण 2015-16 ते 2024-25 (1 नोव्हेंबर मेरेन) अर्थीक वर्स (1 नोव्हेंबर मेरेन) अनुसूचीत जाती, अनुसूचीत जनजाती आनी ओबीसी समुदायांतल्या 89 हजार 270 लोकांक हे येवजणे खाला रीण मंजूर केलां. वट्ट लाबार्थ्यां मदले 18.18 टक्के लाबार्थी ह्या तीन समाजांतले आशिल्ले. फाटल्या धा वर्सांत ह्या समाजांतल्या व्यक्तींक 478.16 कोटी रिणां दिल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
