भांगरभूंय | प्रतिनिधी
वास्को: बंदर कामगारांच्या वेतन कबलाती संबंदी १५ डिसेंबराक वा ताचे पयलीं अंमलबजावणी जावंक ना जाल्यार मुखेल बंदरांतले कामगार १७ डिसेंबरा उपरांत बेमुजत संप करतले, अशी म्हायती मुखेल बंदर कामगार महासंघांचे राष्ट्रीय समन्वयक समितीचे बसकेंत घेतला.
भारतीय बंदर संघटणेन (इंडियन पोर्ट्स असोसिएशन) देशांतल्या मुखेल बंदर प्राधिकरणांक वेतन समझोत्या संबंदी म्हायती दिवपाची गरज आशिल्ली. दोन म्हयने जावन गेले तरी ह्या समझोत्या संबंदी म्हायती दिवंक ना. हे वृत्ती आड आवाज काडपाचो निर्णय मुखेल बसकेंत घेतिल्ल्याचें कामगारांनी पत्रकार परिशदेंत सांगलें.
देशांतल्या बंदर कामगारांच्या स महासंघांच्या राष्ट्रीय समन्वयक समितीची बसका २३ आनी २४ नोव्हेंबराक गोंयांत जाली. तेन्ना ह्या वेतन कबलाती विशीं चर्चा जाली. मुखेल बंदर प्राधिकरणां आनी बंदर, गोदी कामगारांच्या मान्यता मेळिल्ले महासंघाचे वेतन संरचणुकेंत सुधारणा आनी पेन्शनरी लावा सयत हेर गजालीं विशींची समजिकाय कबलात २७ सप्टेंबराक केल्ली. हे विशीं भारतीय बंदर संघटणेन सगळ्या बंदर प्राधिकरणाक म्हायती दिवपाची गरज आशिल्ली. मात ती संबंधितांक दिवंक नाशिल्ल्याचो दावो केलो. हे कबलातीची म्हायती दिवंक नाशिल्ले खातीर बंदर संघटणेचो सुस्त कारभार आनी कामगार विरोधी वृत्ती आड कामगारांक एकठांय हाडपाचो निर्णय घेतलो.
हाचोच एक भाग म्हणून देशांतले मुखेल बंदरांतल्या संबंदीत अध्यक्षांक २८ नोव्हेंबराक कामगारांच्या स महासंघाच्या सगळ्या संघटणां वतीन ह्या समझोता कराराची अमलबजावणी करपा विशीं निवेदन दिलें. मुरगांव बंदर प्राधिकरणाच्या अध्यक्षांक गोंय बंदर आनी रेल्वे कामगार संघटणा तशेंच गोंय बंदर आनी गोदी कामगार संघटणा ह्या दोन मान्यताय मेळिल्ले संघटणे वतीन निवेदन दिलें. तशेंच प्रत्यक्ष कृतीचो एक भाग म्हणून ५ डिसेंबराक कामगार फिती बांदून निशेध दीस पाळटले. तेन्ना सगळे मुखेल बंदराच्या प्रशासकीय इमारतीं मुखार सामुहीक निदर्शनां करतले.
हे पत्रकार परिशदेक पी.एम. मोहम्मद हनीफ (कोचीन), सी.डी. नंदकुमार (कोचीन) एस.आर अपराज( मुंबई) एल. सत्यनारायण ( कांडला) व्हि. सत्यनारायण (तुतीकोरीन), एन. व्हि राजेंद्रन , ए. बलराम ( चेन्नई), सुधाकर कामत, ए. अबु बेकर, (न्यू मंगलोर), सुरेश पाटील (जेएनपीटी) कस्टोडिडो मेंडोन्सा (मुंबई) वाय. एस. प्रकाश राव (विझाक), थॉमस सेबेस्टियन (कोचीन), क्रुझ मस्कारन्हेस , करीम मुल्ला, बाळकृष्ण फळदेसाय, स्नेहल नाईक (गोंय) आनी हेर हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
