पर्पल फेस्ताक लागून दिव्यांगा खातीर साधन सुविधा तयारः मंत्री फळदेसाय

भांगरभूंय | प्रतिनिधी

पणजी ः पर्पल फेस्त फकत इव्हेंटा पुरतें मर्यादीत ना पूण उपरांत आमी कितें केलां तें म्हत्वाचें. हो महोत्सव घडोवन हाडलें उपरांत गोंयभर दिव्यांगा खातीर सुविधा उबारपाचें काम व्हडा प्रमाणात हातांत घेतलां. पॅरा ऑलिम्पिक्सांक लागून हे फावट पर्पल फेस्त घडोवन हाडप शक्य जावंक ना. पूण फुडाराक पर्पल फेस्त हें जातलेंच, अशें समाज कल्याण मंत्री सुभाष फळदेसाय हांणी सांगलें.
रोटरी क्लब ऑफ रिव्हेरा पणजी हांणी गोंय दिव्यांग हक्क आयोगाच्या जोडपालवान गौरीश मराठे ह्या दिव्यांगाक चायेचो गाडो आशिल्ली रिक्षा भेट दिली. पर्वरी आयोगाचे कचेरेंत जाल्ल्या ह्या सुवाळ्यांत मंत्री सुभाष फळदेसाय हस्तुकी तांकां ही रिक्षा भेट दिली. ह्या वेळार मंत्री फळदेसाय उलयताले. गोंय दिव्यांग हक्क आयुक्त गुरूप्रसाद पावस्कार, सचिव हाजीक ताहा, रोटरी क्लबाचे जिल्लो राज्यपाल शरद पै, सहाय्यक राज्यपाल सॅन्ड्रा फर्नांडीस, अध्यक्ष तन्वी सावंत, सचीव मैथली नाडकर्णी, भगवती ट्रस्टाचे राहूल रजनी आनी ही रिक्षा तयार करपी धुप कंपनीचे अनिरुद्ध अगरवाल हाजीर आशिल्ले.
ह्या सुवाळ्या वेळार रिक्षेचे लाभार्थी गौरीश मराठे हांणी पर्पल फेस्त जावंक नाशिल्ल्यान नाराजी उक्तायली. पर्पल फेस्त आमकां सगळ्या दिव्यांगाक एक माची जावन आसली. पूण हे फावट तें जावंक नाशिल्ल्यान आमी मात्से बेजार आसात आनी तें परत चालीक लावचें, अशें आवाहन केलें.
हाका जाप दितना मंत्री फळदेसाय हांणी सांगले की खाते आनी गोंय दिव्यांग हक्क आयोग पॅरीस पॅरा आलिम्पिकात व्यस्त आशिल्ले कारणान अंदूं पर्पल फेस्त जावंक ना. पॅरीस ऑलिम्पिक उपरांत भारतीय पॅरालिम्पिंक समितीचे मजतीन गोंयांत राष्ट्रीय पॅरा राष्ट्रीय सर्त घडोवन हाडली. हे सर्तीचे आमी बरे भशेन आयोजन केलें देखून आमकां अंदूं वर्सा पर्पल फेस्त करपा खातीर वेळ मेळूंक ना.
आमी पर्पल फेस्ता मेरेनूच मर्यादीत रावचें सोडून हेर दिव्यांग मळांचेरुय पावलां मारतात. फक्त खेळा मळार न्हय तर समाजीक मळार आनी तांकां येणावळी साधन दिवपा खातीरच्या उपक्रमांक उर्बा दितात. दिव्यांगानी फकत घरा बसून मजतीची वाट पळोवची न्ही, तांणी फुडें येवन आपली कुशळटाय आनी तांची क्षमता ते कशें तरेन वापरपाक शकता हे दाखोवचे आनी आमी तांका माची दितलें, अशें फळदेसाय हांणी सांगलें.
पर्पल फेस्त जालें काय दुसरे दिसा दिव्यांगाच्यो समस्या सुटाव्यो जायनात. फाटलें वर्सा सरकारान दिव्यांगा खातीर माक्ना आनी कृत्रिम हात-पाय दिवपा खातीर 2 कोटी मोडल्यात. गोंय वैजकी महाविद्यालयात दिंव्याशु केंद्र सुरू केलां आनी 50 लावार्थ्यांक आमी माक्ना दितात. हे पर्पल फेस्तांक लागूनच जालें. काय जाणांक एके रातीन बदल जाल्लो जाय. तें शक्य ना, अशी म्हायती फळदेसाय हांणी दिली.
गुरूप्रसाद पावस्कार हांणी सांगले की पर्पल फेस्त करून मागीर कितें केलें हें महत्वाचें आसा. ह्या फेस्ता उपरांत रोजगार निर्मिती जावन 40 दिव्यांग व्यक्तीक हालींच ताज समुहान सेवेंत आस्पावन घेतल्यात. काय जाणांच्यो मुलाखती सुरू आसात. काय जाणांक टु व्हिलर दिल्यात आनी ‘स्पायनल कोर्ड रिहेब’ हें सांसणाचें केंद्र सुरू केलां. ह्यो सगळ्यो गजाली पर्पल फेस्ता सावन सुरू जाल्यो. हो इव्हेंट गरजेचो आसा. मंत्र्यांचे मजतीन पर्पल फेस्त जातलेंच. फुडले वर्सा जानेरात न्ही पूण उपरांत पावस सोंपले उपरांत, अशें पावस्कार हांणी सांगलें.