भांगरभूंय | प्रतिनिधी
नवी दिल्ली, खबरां संस्था ः ऑनलायन फटवणूक करपाच्यो घडणुको वाडत आसात. जायते फावटीं ऑनलायन फटवणूक प्रकरणांत बनावट ओटीपी वापरून फटवणूक करतात. हाका लागून जायते फावटीं लोकांक व्हड अर्थीक लुकसाण जाता. लोकांक लुकसाण जावचे न्हय हे खातीर आतां योग्य पावलां उबारतले. हेच फाटभुंयेर 1 डिसेंबर सावन ओटीपी नेमांत व्हड बदल जावपाची शक्यताय आसा.
भारतीय दूरसंचार नियामक प्राधिकरणान आतां जायत्या नागरिकांक बनावट ओटीपी धाडून ऑनलायन फटवणूक करपी घडणुकांचेर आळाबंदा हाडपा खातीर कांय बदल करून म्हत्वाचो निर्णय घेतलें. गिरायकांची फटवणूक जावची न्हय आनी गिरायकांची सुरक्षा वाडोवपा खातीर भारतीय दूरसंचार नियामक प्राधिकरणान नवे नेम चालीक लावपाची तयारी सुरू केल्या. ताका लागून आतां 1 डिसेंबर सावन ओटीपी संदेश मेळपाक कळाव जावपाची शक्यताय आसा.
मजगतीं, भारतीय दूरसंचार नियामक प्राधिकरणांतल्यान नव्या बदलाचो परिणाम जियो, एअरटेल, वोडाफोन, बीएसएनएल ह्या दूरसंचार कंपनींच्या संदेशनाचेर जावं येता. पूण हो परिणाम ऑनलायन फटवणूक घडणुकां पासून राखण दिवपाच्या उपक्रमांतलो एक भाग आसतलो.
जायते फावटीं ओटीपी संदेशाक लागून लोकांच्या बँक खात्यांतल्यान पयशे काडटात. पूण आतां भारतीय दूरसंचार नियामक प्राधिकरणान दूरसंचार कंपनींक अशी फटवणूक आडावपा खातीर संदेश ट्रेस करपाची परवानगी दिवची अशें सांगलां. म्हणल्यार हो संदेश खंयच्यान तयार जाता? खंयच्यान आयलां? हें जाणून घेवपा खातीर वेवस्था करची पडटली. दूरसंचार कंपनींनी ही वेवस्था करूंक ना वा हे संबंदी नेम पाळूंक ना जाल्यार वापरप्यांक ओटीपी मेळप बंद जावं येता वा ओटीपी मेळपाक कळाव जावंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
