भांगरभूंय | प्रतिनिधी
स्वतंत्र भारताचे पयले प्रधानमंत्री पंडीत जवाहरलाल नेहरू हांच्या जल्मा दिसाच्या उगडासाक राश्ट्रीय पुस्तक दीस मनयतात. बालदिनाक हो दीस मनोवपाक सुरवात जाता आनी 20 नोव्हेंबराक सोंपता.
इन्स्टिट्यूट मिनेझीस ब्रांगाजा दरवर्सा पुस्तक सप्तक दबाज्यान मनयता. 18 ते 24 नोव्हेंबर हो सुमान तांणी तो मनयलो. पुस्तक प्रदर्शन आनी विक्री सांगाता, विवीध मळांचेर नामना मेळयिल्ल्या भारतांतल्या तशेंच गोंयच्या मानेस्तांच्या तैलचित्रांचें प्रदर्शन सभाघराचे एके वटेन वांगडी सचीव अशोक परब हांच्या मार्गदर्शना खाल घडोवन हाडिल्लें. हीं सगळीं तैलचित्रां संस्थेचे आदले सचीव आनी चित्रकार संजय हरमलकार हांणी पिंतारिल्लीं. सुवाळ्याचें उक्तावण 18 नोव्हेंबराक सांजेर जालें. गोंयच्या 15 पुस्तक विक्रेत्यां वांगडा कला आनी संस्कृती खातें आनी ताच्या खाल चलपी कांय खात्यां सयत पणजे आनी म्हापशेंच्या कांय खासगी पुस्तक विक्रेत्यांनी प्रदर्शनांत वांटो घेतललो.
कार्यावळीची सुरवात ‘रिस्टार्ट, रिस्टार्ट’ हे मराठी एकांकिकेन जाली. पुराय तरेन बायलांनी केल्ल्या हे एकांकिन पुस्तक प्रदर्शनाक एक उर्बा हाडली. 9 नोवेंबराक ‘रजनीगंधा’ कार्यावळींत हिंदी फिल्मी गितां, मराठींतलीं भावगितां आनी भक्तीगितां तशेंच कोंकणींतल्या गितांनी रजनी ठाकूर आनी सांगात्यांनी कान तृप्त केले. वो शाम कुछ अजीब थी, ये शाम भीअजीब है, हो अणभव हीं गितां आयकून आयलो. रिस्टार्टाच्या तडफदार बायलांनी आदले दिसा अजाप करून सोडलें आनी रजनी ठाकुर आनी पंगड हांच्या गितांनी पळोवपी मंत्रमुग्ध जाले. 20 तारखेच्या ‘उषा स्वप्न बाणासूर’ ह्या लोकनाट्याक लागून पुस्तक प्रदर्शन आनी विक्रेक बरो प्रतिसाद मेळ्ळो. हें लोकनाट्य वाळपयच्या विजय गांवकार पंगडान सादर केल्लें. 21 वेर कलामोगी कांदोळेच्या तोमाजीन कार्दोज हांच्या पंगडान सादर केल्ल्या कोंकणी कांतांरांनी, लोकांक बसलेले कडेन पांय थिरकावपाक लागले आनी तीय सांज बरी रंगून गेली. ‘भावबंद कोकण’चे ह्या दो. सायली लळीत आनी पंगड हांच्या मालवणी कवितेचेर सादर केल्ली नाटकुलीं एकदम वैशिश्ट पूर्ण थारलीं. म्होवाळ मालवणी भास, दिसपट्ट्या घडामोडींचेर आदारिल्ल्यो म्होवाळ मालवणी कविता आनी ताचेर बरे तरेन बसयल्लीं नाट्यकृती एकदम तुस्त करपा सारकी आसली. हिंदीत म्हणशात जाल्यार एकदम लाजवाबशी. मालवणी कवितेचेर नाटक करपाची कल्पना आनी प्रयोग मनाक भावलो. ‘घुंगूर काठी- सिंधुदुर्ग’ निर्मीत आनी करवंद निर्मित आनी प्रस्तूत मालवणी कवितेंचे कथन आनी नटन परत परत सादर जावपाक जाय. हाची देख घेवन गोंयच्या कोंकणी कवितेंचेरूय कथन आनी नटन जावपाकूच जाय. केन्नाय कितें तरी वेगळें करून पळेवपाक जाय, एके नवे तरेन कविता सादर जावपाक जाय.
23 तारखेर कोंकणी कवितेतली वेंचीक वज्रकणी, याद आस्वाद आनी अनुवाद ह्या विशयाचेर परिशद संस्थेच्या परिशद सभाघरांत जाली. परिशद दीसभर चलली. दो. किरण बुडकले मुखेली आसल्यो. म्हालगडे बरोवपी ॲड. उदय भेंब्रे हांणी ह्या वेळार विचार मांडले. जायत्या कोंकणी बरोवप्यांनी, शिकोवप्यांनी, कोंकणी विद्यार्थ्यांनी हे परिशदेंत वांटो घेतलो. 24 वेर तैलचित्रांचे प्रदर्शन दीस भर लोकां खातीर उगतें दवरललें. सांजेर जुस्त 4 वरांचेर संस्थेच्या स्थापना दिसा निमतान आदले तशेंच आताचें जाळवणदार, कला आनी संस्कृती खात्याचे आदले तशेंच आताचें अधिकारी हांचो मुख्यमंत्री प्रमोद सावंत हांचे हस्तुकीं भोवमान जालो. पांच (कोंकणी, मराठी, हिंदी, संस्कृत आनी इंग्लीश) भासांनी उजवाडाक येवपी ‘गोवापुरी’ ह्या स म्हयन्याळ्याचें मुख्यमंत्रांच्या हस्तुकीं प्रकाशन जालें. लोकवेदाच्यो अभ्यासक दो. जयंती नायक हांणी ह्या अंकाचें संपादन केलां. ह्याच बरोबर ‘मंथन’ आनी ‘कपयाळें’ ह्या पुस्तकांच्या इंग्लीश अणकारांचें विमोचन जालें. दो. बुडकुले आनी तांच्या सहकाऱ्यांनी पुस्तकांचो अणकार करपाक हातभार लायल्लो.
15 पुस्तक विक्रेत्यांचो आनी पुस्तकां प्रदर्शनाक मांडलेल्यांचोय मुख्यमंत्र्यांनी प्रमाणपत्रां दिवन भोवमान केलो. माशेंतल्या नार्वेंकार हांणी मांडिल्ल्या तांच्या 2024 च्या दिवाळी अंकाच्या फराळा सयत साहित्य मोग्यांनी कार्यावळींचो आस्वाद घेतलो. राजहंस संकल्पना, पणजी हांच्या रंगीत भुरग्यांच्यो साहित्यान प्रदर्शनाची सोबाय वाडयली. गोमंतक मराठी अकादेमीची, ब्राॅडवे बुक सेंटर, क्युरेट बुक्स, द रिडींग प्लेनेट म्हापशें, वर्षा बुक स्टाॅल, पणजी, तियात्र अकादेमी, पणजी, दाल्गादो कोंकणी अकादेमी, कला आनी संस्कृती खातें, पणजी आनी गोंय मध्यवर्ती वाचनालय पणजी ह्या सगळ्यांनी पुस्तक प्रदर्शन आनी विक्रेंत वांटो घेतलो. जायत्या मानेस्तांनी पुस्तक प्रदर्शनांचो आनी विक्रेचो लाव घेतलो. पणजेकार शारांत केल्ल्या विद्यूत उजवाडांत दिपकावन गेल्लो. आयत्यो सिनेतारका पळोवपाक मेळटल्यो हे आशेन आमचे मातयेतले कलाकार आपली कला सादर करतना तांकां फाटबळ, उर्बा दिवन तांची उमेद वाडोवपाक मात ते खूब फाटी उरले.
प्रीता परब
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
